Ölvuð kona með fíkniefni í fórum sínum ók á ljósastaur

Ölvuð kona, með fíkniefni í fórum sínum, er grunuð um að hafa ekið bíl yfir Melatorg í Reykjavík á þriðja tímanum í nótt, og hafnað á ljósastaur.

Hún var við bílinn þegar lögreglu bar að, en vildi ekki kannast við að hafa ekið honum, né heldur vita hver gerði það.

Hún var fyrst flutt á slysadeild þar sem gert var að sárum hennar á hendi og fæti, en síðan á lögreglustöðina, þar sem reynt er að greiða úr málinu.

Skömmu síðar missti önnur kona stjórn á bíl sínum á hálkubletti á mótum Reykjanesbrautar og Breiðholtsbrautar og hafnaði bíllinn á götuvita, sem brotnaði niður. Hún var flutt á slysadeild til aðhlynnigar og tæknimenn voru kallaðir út til að aftengja götuvitann.