Kvennaathvarfið flutt

Á laugardaginn flutti Kvennaathvarfið í nýtt hús sem keypt var og endurbætt fyrir gjafa- og söfnunarfé. Lengi hafði verið stefnt að flutningum en gamla húsið við Hverfisgötuna var fyrir nokkru hætt að rúma starfsemina á viðunandi hátt samkvæmt tilkynningu frá Kvennaathvarfinu.

Í nýja húsinu eru fleiri svefnherbergi, fleiri baðherbergi og almennt betri aðstaða svo meira næði verður innanhúss auk þess sem næturlíf miðborgarinnar mun ekki halda vöku fyrir íbúum hússins.

Nú verður hægt að endurvekja hópastarf sem undanfarið hefur liðið fyrir aðstöðuleysi, aðgengi fyrir hreyfihamlaða er betra og börnin fá sitt pláss innan húss og utan.

Heimilisfang athvarfsins er enn ekki gefið upp opinberlega en sími athvarfsins, 5611205 er sem fyrr opinn allan sólarhringinn og þangað er þeim bent á að hringja sem vilja nýta sér þjónustu Kvennaathvarfsins.