Þarf að greiða 20 þúsund þökk sé einu símtali

Lögreglan á Vestfjörðum stöðvaði tvo ökumenn í síðustu viku fyrir að tala í farsíma án þess að nota handfrjálsan búnað. Í báðum tilvikum var um að ræða ökumenn sem óku um götur Ísafjarðar.

Annar ökumaðurinn stöðvaði ekki við stöðvunarskyldu og má hann því búast við sektum vegna tveggja umferðarlagabrota, eða alls kr. 20.000 auk tveggja punkta í ökuferilskrá. Dýrt símtal það.

Þá var fékk fiskibátur á sig brotsjó í mynni Ísafjarðardjúps í síðustu viku. Rúður brotnuðu í stýrishúsi og siglingatæki hættu að virka. Þrír voru í áhöfn bátsins en þá sakaði ekki. Skipstjóra tókst að stýra bátnum heilu og höldnu til hafnar í Bolungarvík samkvæmt upplýsingum frá lögreglu.

Tvær tilkynningar bárust lögreglunni í síðustu viku vegna eignaspjalla sem unnin voru á jafnmörgum bifreiðum. Önnur þeirra stóð mannlaus við Traðarland í Bolungarvík þann 8. febrúar síðastliðinn. Atvikið gæti hafa gerst aðfaranótt 9. janúar.

Svo virðist sem grjóti hafi verið kastað í bifreiðina, sem er svört Mazda. Í hinu tilvikinu var um að ræða ljósgráa Chryslerbifreið sem stóð mannlaus á bryggjunni skammt frá Pollgötu á Ísafirði milli kl.02:00 og 03:00 aðfaranótt 10. febrúar sl. En svo virðist sem einhver hafi beyglað bifreiðina á tveimur stöðum. Þeir sem hafa einhverja vitneskju um þessi eignaspjöll eru hvattir til að hafa samband við lögregluna í síma: 450 3730.