Ákæruliðum vísað frá gegn manninum sem ætlaði að flytja inn í Ráðherrabústaðinn

Hæstiréttur Íslands staðfesti frávísunarúrskurð Héraðsdóms Reykjavíkur um að vísa frá þremur ákæruliðum af fjórum gegn karlmanni sem var ákærður fyrir að brjótast inn í Ráðherrabústaðinn við Tjarnargötu árið 2011. Ástæðan er sú að frestur til þess að kæra manninn var liðinn nema í síðasta tilvikinu, sem var ágúst árið 2011.

Maðurinn, sem er um fertugt, braust einnig tvívegis inn í Ráðherrabústaðinn í janúar árið 2011.

Síðasta innbrotið var í ágúst síðastliðnum, en þá braut hann rúðu í kjallara hússins. Í öll skiptin dvaldi maðurinn í bústaðnum þar til lögreglu bar að og handtók hann.

Maðurinn, sem hefur margsinnis komist í kast við lögin, meðal annars fyrir ofbeldisbrot, er heimilislaus. Fyrir þar síðustu jól tók hann reyndar upp á því að skrá lögheimili sitt í Ráðherrabústaðinn, en staðreyndin er sú að hver sem er getur skráð lögheimili sitt hvar sem er, svo lengi sem það er í íbúðarhúsnæði.

Eftir að maðurinn hafði ítrekað brotist inn í húsið breytti þjóðskrá skráningu mannsins.

Í niðurstöðu héraðsdóms er það staðfest að það sé forsætisráðherrann sjálfur, sem fer ræður yfir eigninni, en ekki fjármálaráðherra eins og verjandi mannsins hélt fram. Því gerir embættið skaðabótakröfu á hendur manninum, en krafist er tæplega 800 þúsund krónur í bætur.

Það hrekkur þó skammt miðað við þá fjárhæð sem maðurinn telur ríkið skulda sér. Í frétt um málið á Stöð 2 árið 2011 kom fram að maðurinn álíti sem svo að ríkið skuldi honum svimandi háa upphæð - og vildi hann með þessu athæfi vekja athygli á því en hann hefur gert kröfu á hendur ríkisins upp á 14,7 milljónir evra - sem jafngildir röskum tveimur milljörðum króna.