Einstaklega fá slys í síðustu viku

Í síðustu viku slösuðust fjórir vegfarendur í þremur umferðaróhöppum á höfuðborgarsvæðinu. Færri slys hafa ekki orðið á einni viku það sem af er ári samkvæmt dagbók lögreglunnar.

Í einu þessara tilvika var ekið á gangandi vegfaranda á gangbraut, í öðru var um biðskyldubrot að ræða og í því þriðja var ekið á móti rauðu ljósi. Í öllum tilvikum var því um aðgæslu- eða tillitsleysi ökumanna að ræða gagnvart öðrum vegfarendum.

Vegna aðstæðna í einu þessara slysa, þar sem ekið var á gangandi vegfaranda á gangbraut, hvetur lögreglan gangandi vegfarendur að sýna fyllstu aðgæslu þegar farið er yfir götu og fullvissa sig um að ökumenn aðvífandi ökutækja hafi séð þá og muni stöðva áður en farið er yfir.

Þá hvetur lögregla ökumenn sem fyrr til að gæta ávallt að gangandi vegfarendum hvenær sem þeirra getur verið von og stöðva ætíð við gangbrautir.