"Ég dó næstum því og ég er ekki að djóka!"

„Ævintýralegasta og hræðilegasta reynslan! Ég dó næstum því og ég er ekki að djóka! Ég fastur í kofa sem ég fann fyrir tilviljun. Ég þarf að hringja í forstöðumanninn og biðja um hjálp, og að borga honum en ég get ekki hringt."

Svona hljóma SMS skilaboð sem ítalskur ferðalangur sendi kunningja sínum í gær. Maðurinn kallaði eftir aðstoð á Fimmvörðuhálsi fyrr í dag og fóru sleðamenn björgunarsveita og sóttu hann í skála Útivistar á Fimmvörðuhálsi og fluttu að Baldvinsskála þar sem bílar biðu.

Fleira ferðafólk er með í för þar sem Í ljós kom að í Baldvinsskála voru staddir tveir ferðamenn sem komust hvorki lönd né strönd vegna veðurs.

„Erlendir ferðalangar sem lenda í vandræðum hér á landi nota margvíslegar leiðir til að kalla eftir aðstoð. Fyrstu fregnir af vandræðum þess ítalska bárust þegar ferðamenn sem hann hafði slegist í för með um tíma hér á landi höfðu samband við lögreglu eftir að hafa fengið sms boð frá honum. Þar sagðist hann sitja fastur í skála sem hann rakst á fyrir tilviljun eftir miklar hrakningar. Á þeirri stundu var ekki vitað hvar hann var staddur og var eftirgrennslan hafin. Boð í gegnum neyðartalstöð komu síðar og var þá hægt að staðsetja hann nákvæmlega.

Slík atvik minna á hversu mikilvægt það er að skilja alltaf eftir ferðaáætlun hjá aðstandanda, vini eða öðrum sem brugðist getur við ef eitthvað hefur farið úrskeiðis. Hana má líka gera á vefnum safetravel.is þar sem ferðalangar eru leiddir í gegn um gerð hennar. Þar má að auki velja vöktun en þá er fylgst með að ferðalangur skili sér heim heilir á húfi,“ segir í tilkynningu frá Slysavarnafélaginu Landsbjörg.