Segir öryggi Eyjamanna stefnt í voða verði skurðstofu lokað

Þau áform yfirvalda að loka skurðstofu Heilbrigðisstofnunar Vestmannaeyja þann 1. október næstkomandi mæta mikilli andstöðu bæjarráðs Vestmannaeyjabæjar. Elliði Vignisson bæjarstjóri, sem sjálfur á skurðstofunni margt að þakka, segir öryggi Eyjamanna sem og gesta þar stefnt í voða og óttast að fæðingar muni heyra sögunni til í Eyjum.

Á skurðstofunni vinna bæði skurð- og svæfingalæknar og segir Elliði að slíkir sérfræðingar komi að öllum tilfellum eins og alvarlegum slysum, beinbrotum, alvarlegum veikindum og barnsfæðingum, þar með töldum bráðakeisurum. „Það kom fyrir í ágúst að héðan var ekki fært í meira en einn sólarhring svo menn geta ímyndað sér hvernig það getur verið að vetri,“ segir Elliði. „Þá getur brugðið til beggja vona ef þessarar þjónustu nýtur ekki við.“

Hann segir ítrekað hafa reynt á mikilvægi skurðstofunnar. Til dæmis sé ekki langt síðan maður féll fram af klöpp í Brandi og slasaðist alvarlega.

En hvernig vill Elliði skera niður? „Ég myndi vilja ræða það af fullri alvöru að við byggjum þannig um hnútana að það yrði til ein velferðarstofnun sem hefði með höndum alla heilbrigðis- og velferðarþjónustu. Þar með talið heilbrigðisþjónustu aldraðra, dvalarheimili aldraðra, heimahjúkrun, heilsugæsluna, hjúkrunardeildirnar og félagsþjónustuna. Þannig mætti spara verulegar fjárhæðir.“

Hann segist hafa rætt við Kristján Þór Júlíusson velferðaráðherra og að ráðherrann muni funda með yfirvöldum í Eyjum í enda þessarar viku eða byrjun þeirrar næstu.

Elliði segist þekkja mikilvægi skurðstofunnar á eigin skinni. „Ég hef tvisvar lagst undir hnífinn þarna og svo er annað barna minna fætt þar,“ segir hann.

„Ef þessi áform hefðu verið komin til hefðum við þurft að búa inni á fólki í viku til tíu daga í Reykjavík þar til allt væri um garð gengið og ég óttast að það verði hlutskipti margra héðan því ef af þessu verður munu allar konur með fyrsta barn fæða í Reykjavík og allar áhættumeiri fæðingar færu fram þar líka. Maður óttast það nú helst að fæðingar muni leggjast af hér.“