Íslenskt hráefni kynnt fyrir þýskum matgæðingum

Íslenskt sjávarfang og lambakjöt verða í aðalhlutverki í fjölmennri matarveislu sem haldin verður í húsakynnum þýsku verslunarkeðjunnar Frischeparadies í Berlín þann 1. september nk.

Veislan er liður í kynningarátaki Frischeparadies á ferskum íslenskum hágæða afurðum sem stendur yfir í septembermánuði, segir í tilkynningu frá Íslandsstofu sem er samstarfsaðili Frischeparadies í þessari kynningu ásamt sendiráði Íslands í Berlín. Markmiðið er að kynna íslenskt hráefni og vekja almenna athygli á Íslandi og íslenskri matarmenningu.

Boðið verður upp á sjö rétta matseðil þar sem fimm réttir eru úr íslensku hráefni og mun Þráinn Freyr Vigfússon, núverandi fyrirliði íslenska kokkalandsliðsins og matreiðslumaður ársins árið 2007, elda einn þessara rétta.

Samhliða heimsókn sinni til Berlínar mun Þráinn Freyr elda íslenskan þorsk í matreiðslu¬þættinum Berlin Kocht. Sendiherra Íslands í Þýskalandi, Gunnar Snorri Gunnarsson, mun vera Þráni til halds og trausts í útsendingunni og kynna íslenskar matvörur fyrir þýskum matgæðingum en um 180 þúsund Berlínarbúar horfa vikulega á þáttinn.

Lambakjötið er nýjung í framboði Frischeparadies og verða afurðir frá SAH á Blönduósi til sölu í verslunum þeirra í sjö borgum í Þýskalandi og í verslun þeirra í Vín í Austurríki næstu fjóra mánuði.