Fólk hvatt til að festa trampólín og garðhúsgögn

Búast á við snörpum vindhviðum á öllu landinu. Samkvæmt upplýsingum frá Veðurstofu Íslands verður veðrið verst við suðurströndina í kvöld, færist yfir á norðurströndina í nótt og austurhluta landsins á morgun.

Hætta er á að lausir munir fari á hliðina og því er fólk hvatt til að huga að til dæmis trampólínum og garðhúsgögnum. Einnig er mælt með að vera ekki á ferðinni í kvöld og nótt að ástæðulausu um norðurland en þar er spáð mikilli rigningu og jafnvel snjókomu.

Nú þegar er meðalvindur á Holtavörðuheiði 18 m/sek og hviður fara upp í 27 m/sek. Þar gæti færð orðið slæm í kvöld og í nótt.

Samkvæmt lögreglunni á Blönduósi er þó enn rólegt veður í bænum og sýnist mönnum að bændum takist að klára að reka fé í réttir áður en óveðrið skellur á.