Sandgerðingar óvænt krafðir um lóðarleigu

Fjöldi Sandgerðinga hefur undanfarna daga fengið sent bréf frá bæjaryfirvöldum þar sem þeim er tilkynnt um óvænta hækkun fasteignagjalda. Ástæðan er sú að bærinn hefur samið við landeigendur um að innheimta lóðarleigu sem ekki hefur verið rukkað fyrir í fjölda ára. Upphæðin nemur tugum þúsunda á ári.

Á sérstökum umræðuvef Sandgerðinga á Facebook lýsa margir íbúar bæjarins yfir óánægju með bréfið. Þar velta menn fyrir sér hvort þegar gerðir lóðarsamningar séu ekki enn í fullu gildi og segja jafnframt að eðlilegra hefði verið að bæjaryfirvöld tilkynntu þeim um málið með öðrum hætti en að senda þeim „innheimtubréf“. Ganga sumir svo langt að segja vinnubrögð bæjaryfirvalda „til skammar“.

Sigrún Árnadóttir, bæjarstjóri í Sandgerði, segir í samtali við Fréttablaðið að landeigendurnir, félögin Garður ehf. og Fiskiðjan ehf., hafi ekki innheimt lóðarleigu um lengri tíma þótt það hefði verið fullkomlega heimilt. Fulltrúar þeirra hafi komið að máli við bæjaryfirvöld og óskað eftir samkomulagi um að bærinn sæi um innheimtuna.

Sigrún kveður sér einnig hljóðs í umræðunum á Facebook og segir þar að samkomulagið hafi verið gert með hagsmuni bæjarbúa í huga. Landeigendum hefði verið í sjálfsvald sett að rukka svo til hvað sem væri og innheimta jafnframt gjaldið fyrir síðustu fjögur ár. Bærinn hafi hins vegar séð til þess að gjaldið yrði 1,5 prósent af fasteignamati, sem er sambærilegt við það sem bærinn rukkar af eigin lóðum, og að ekki yrði rukkað aftur í tímann.

„Fólk hefur komið og hringt og fengið svör og skýringar. Það er ekkert óeðlilegt að fólk sé ekki sátt við að fá reikninga sem það hafði ekki gert ráð fyrir eða búist við. Þetta eru auðvitað viðbótarútgjöld fyrir heimili sem hingað til hafa ekki borgað lóðarleigu,“ segir Sigrún við Fréttablaðið.

Hún segir nokkuð mörg heimili hafa fengið bréf af þessu tagi, en hún hafi þó ekki töluna á reiðum höndum. Það hafi þó verið vel innan við helmingur íbúa í Sandgerði. Yfirleitt sé leigan á bilinu 20 til 40 þúsund krónur á ári.

Sumir íbúar hafa lagt til að haldinn verði íbúafundur í bænum vegna málsins. „Ég geri ráð fyrir að við munum gera það og fara þar yfir þessi landamál yfir höfuð,“ segir Sigrún.