Enginn bolli eins

Ólöf Erla Bjarnadóttir leirkerasmiður sendi nýverið frá sér mismunandi bolla sem þó eiga það sameiginlegt að í þá fer nákvæmlega sama magn af postulíni.

Bollarnir heita 210 því ég vigta nákvæmlega 210 grömm af postulínsleir í þá,“ útskýrir Ólöf Erla Bjarnadóttir, leirkerasmiður í Kirsuberjatrénu,en bollarnir eru meðal þess nýjasta sem hún sendir frá sér nú fyrir jólin. Spurð af hverju 210 grömm, segir hún það vera það magn sem hún venjulega notar til að renna meðalstóran bolla úr postulínsleir. 

„Mig langaði hins vegar til að teygja mig eins og hægt væri í báðar áttir með þetta magn, í þykka og þunna bolla en samt þannig að þeir þjónuðu ákveðnu notagildi. Þeir stærstu eru næfurþunnir tebollar en þeir minnstu þykkir espresso bollar.“

Sjálf er Ólöf Erla mikil kaffimanneskja og drekkur ólíka kaffidrykki úr ólíkum bollum. Á kvöldin drekkur hún hins vegar te.

„Nú til dags drekkur ein og sama manneskjan margvíslega drykki yfir daginn og það má segja að það hafi verið kveikjan að hugmyndinni. Ég byrja til dæmis sjálf á cappuccino á morgnana, espresso í eftirmiðdaginn og svo te á kvöldin. Fyrir þetta þarf mismunandi bolla, þykkan lítinn bolla fyrir espresso og þunnan stóran bolla fyrir te.“

Hver 210 bolli er einstakur og ólíkur öllum hinum en þó má sjá svip milli þeirra, svo sem eins og hjá einstaklingum innan sömu fjölskyldu, útskýrir Ólöf Erla. Hún segir rennslu á leir ekki bara tækni heldur hafi hver rennari sín persónulegu einkenni svipað og pensildrættir hjá málara.

„Mín menntun og minn bakgrunnur er í listhandverki, þar sem hvert stykki er einstakt. Allir bollarnir eru glerjaðir með hlutlausum glerungi til að draga sem best fram mismunandi form og stærð hvers bolla. Ég vonast til að bollarnir sýni persónueinkenni mín sem rennara. Það er mjög gaman að vinna svona og ég á örugglega eftir að vinna fleiri hluti á þennan hátt, það er mismunandi hluti úr sama magni af leir.“