Bræður grunaðir um dópsmygl

Lögregla handtók í fyrradag 35 ára karlmann vegna rannsóknar á stórfelldu amfetamínsmygli sem upp komst í janúarlok. Hann var í gær úrskurðaður í gæsluvarðhald til 21. febrúar.

Fjórir aðrir hafa setið í varðhaldi vegna málsins síðan um mánaðamót, tveir Litháar og tveir Íslendingar. Annar Íslendinganna er 39 ára gamall bróðir þess sem handtekinn var í fyrradag, samkvæmt heimildum Fréttablaðsins. Bræðurnir hafa rekið fyrirtæki saman um skeið.

Málið er mikið að vöxtum. Það snýst um innflutning á tugum kílóa af amfetamíni til landsins í nokkrum póstsendingum sem komu til landsins sjóleiðina frá Kaupmannahöfn. Lagt var hald á þær í næstsíðustu viku janúar.

Sjötti maðurinn sat í gæsluvarðhaldi um tíma vegna málsins en honum var síðan sleppt. Þrír til viðbótar hafa verið handteknir við rannsóknina, tveir karlar og ein kona, en þeim sleppt jafnóðum.

Efnið sem lagt var hald á er bæði í vökva- og duftformi og endanleg greining á magninu liggur ekki fyrir. Að því er segir í tilkynningu frá lögreglu í gær miðar rannsókninni þó vel.