Forseti geti misnotað málskotsrétt

Á meðal þess sem Feneyjanefndin gagnrýnir í áliti sínu er málskotsréttur forseta. Hún segir óheppilegt að kerfið geri ráð fyrir því að helstu stofnunum stjórnkerfisins, Alþingi og ríkisstjórn annars vegar og forsetanum hins vegar sé stillt upp hverri gegn annarri. Slíkt geti skaðað einhvern aðilann.

Þá sé hætta á því að forseti sem er á öðrum enda hins pólitíska litrófs en meirihluti Alþingis og er kosinn beinni kosningu en hefur ekki margar skyldur, noti þetta ferli í óvinsælum lögum til að skaða stjórnina. „Það ferli gerir forsetann augljóslega að þátttakanda í stjórnmálum, þrátt fyrir að honum sé að öðru leyti ætlað að vera hlutlaus þjóðhöfðingi.“

Stjórnlagaráð lagði ekki til breytingar á málskotsrétti forsetans í drögum sínum.