Binda vonir við að hjúkrunarfræðingar dragi uppsagnir til baka

„Það er ánægjulegt að stjórn spítalans og hjúkrunarfræðingar skyldu ná saman," segir Guðbjartur Hannesson velferðarráðherra um nýjan stofnanasamning sem var undirritaður á fundi hjúkrunarfræðinga með fulltrúum Landspítalans seint í gær.

„Við bindum náttúrulega bara miklar vonir við að það verði til þess að hjúkrunarfræðingar dragi uppsagnir sínar til baka og við getum rekið hér öflugt sjúkrahús og sameinast um að efla það."

Spurður hvort hann telji að aðrar starfsstéttir í heilbrigðisgeiranum eða aðrir opinberir starfsmenn geri sömu kröfur í kjölfarið, segir Guðbjartur svo geta vel verið.

„Við leggjum upp með það að vinna hér að jafnlaunaátaki þar sem er sérstakur fókus einmitt á heilbrigðisstéttina í byrjun. Það mun því auðvitað verða unnið að því áfram í tengslum við kjarasamninga og eins líka stofnanasamninga þannig að við erum undir það búin að hluta."