Búið að veiða um 40 tonn í Kolgrafafirði

 „Við fáum 80 þúsund krónur fyrir tonnið af síldinni og af þeim hirðir ríkið 20 þúsund. En Þetta eru alveg ótrúlega skemmtilegar og spennandi veiðar. Annað hvort er netið fullt af síld eða það er ekkert “ segir Magnús Snorrason skipstjóri á Sigga afa, 6 tonna smábát sem gerður er úr frá Stykkishólmi.

Magnús er einn þeirra smábátasjómanna sem hafa verið að síldveiðum fyrir innan brú í Kolgrafafirði. Enginn veit hversu mikið er af síld í firðinum en menn telja það gætu verið allt að hundrað þúsund tonn.

Sjö til átta smábátar hafa verið við veiðar fyrir innan brúna í gær og fyrradag. Í gærkvöldi var búið að landa um 40 tonnum af síld úr Kolgrafafirði í Grundarfirði og í Stykkishólmi.

„Það var mokveiði í gærmorgun en þegar leið á daginn datt botninn úr veiðunum,“ sagði Magnús.

Bjarni Sigurbjörnsson bóndi á Eiði í Kolgrafafirði segir að mönnum hafi verið létt þegar fór að hvessa og rigna í gær.

„Við erum rosalega ánægð með svona veður þá er meira súrefni í sjónum og líkurnar á því að síldin drepist minnka,“ segir Bjarni.

Hann segir að hans fyrsta verk í gærmorgun hafi verið að fara út og gá hvort að dauða síld hefði rekið á land.

„Mér létti þegar ég sá enga síld og kættist mjög þegar ég sá 12 erni sem voru á sveimi yfir firðinum,“ segir Bjarni.

Í dag eða morgun verður tekin ákvörðun um hvort að reynt verður að koma upp löndunaraðstöðu í Kolgrafafirði. Bjarni segir að búið sé að finna stað sem gæti hentað vel þess að koma slíkri aðstöðu upp.

Hafsteinn Garðarsson hafnarstjóri í Grundarfirði segir að síldin úr Kolgrafafirði sé bæði stór og góð og fari öll til manneldis.

Ekki er aðstaða til að vinna hana í Grundarfirði svo hún fer beint upp á vörubílspall og er ekið með hana til Akraness og í Þorlákshöfn. Síldinni sem landað er í Stykkishólmi er unnin á staðnum.

Sjávarútvegsráðherra leyfði smábátum frjálsar síldveiðar innan brúar í Kolgrafafirði í fjóra daga á föstudag og rennur leyfið út á morgun.

Landssamband smábátasjómanna hvetur þá sem hafa hug á að halda veiðunum áfram að snúa sér þegar stað til Fiskistofu og sækja um leyfi fyrir því magni af síld sem þeir hyggjast veiða.