Gámabíll vóg salt á gilbrún

Minnstu munaði að stórslys yrði á Svalbarðseyri við Eyjafjörð laust fyrir klukkan tíu í gærkvöldi þegar stór dráttarbíll með fullestaðan gám, vóg nánast salt á gilbrún , en fallið þar er tíu til 15 metrar og hefði gámurinn að líkindum kramið bílstjórahúsið.

Þetta gerðist í gili, þar sem verið er að endurnýja ræsi. Hjáleið var lögð framhjá vinnusvæðinu og ökumaður flutningabílsins var ný búinn að mæta bíl. Þegar hann hækkaði ljósin aftur sá hann merkingarnar of seint, ók í gegnum allar hindranir og utan í 20 tonna jarðýtu, sem kastaðist til, uns bíllinn nam staðar að hluta til kominn fram af gilbarminum og hallaðist svo mikið, að afturhjólin öðru megin voru á lofti.

Svo vel vildi til að tengingin á milli bíls og vagns hélt þannig að vagninn hafnaði ekki á bílnum. Hvorki ökumann nér farþega sakaði og segir lögreglan á Akureyri það vera ótrúlega heppni.