MR-ingar fylkja liði í menntamálaráðuneytið

Nemendur í Menntaskólanum í Reykjavíku munu fylkja liði að menntamálaráðuneytinu nú fyrir hádegi þar sem þau mótmæla skertum framlögum til skólans á fjárlögum ársins 2014.

Vísir fjallaði um málið í síðustu viku þegar haldinn var neyðarfundur í skólanum með fulltrúum skólanefndar, foreldra, kennara og nemenda vegna stöðunnar sem komin er upp þar sem MR fær lægri fjárframlög á hvern nemanda en aðrir sambærileg skólar.

Formaður skólanefndarinnar sagði við það tækifæri að stjórnendur skólans stæðu ráðþrota frammi fyrir stöðunni og ef ekki færi fyrir fórnfýsi þeirra og sjálboðavinnu þá væri skólastarfið farið að líða verulega fyrir þetta.

MR-ingar búast við að um 500-600 nemendur muni mæta í mótmælagönguna en þeir hyggjast afhenda ráðuneytinu undirskriftalista nemenda sem rituðu undir eftirfarandi yfirlýsingu:

„Ég, undirrituð/aður, krefst þess að ég, sem nemandi Menntaskólans í Reykjavík, verði metin/nn til jafns við nemendur sambærilegra framhaldsskóla á Íslandi. Mér er fyrirmunað að skilja af hverju framlög ríkisins til Menntaskólans í Reykjavík eru mun lægri en til sambærilegra framhaldsskóla á landinu. Ég krefst þess að þessi munur verði leiðréttur á fjárlögum ársins 2014.“