Skiptir máli hvaða upplýsingum er lekið

Þingmenn Pírata krefjast þess að Hanna Birna Kristjánsdóttir innanríkisráðherra og ráðuneytisstjóri innanríkisráðuneytisins verði kölluð fyrir stjórnskipunar- og eftirlitsnefnd Alþingis í þessari viku, vegna leka á upplýsingum um tvo hælisleitendur í Fréttablaðinu í síðustu viku. Birgitta Jónsdóttir þingmaður Pírata segir nauðsynlegt að fá skýr svör um hvaðan lekinn kom.

„Út af því að þarna erum við að tala um leka á mjög viðkvæmum persónuupplýsingum fólks sem er í mjög viðkvæmri stöðu. Það hefur aldrei gerst áður að leki á þennan hátt hafi komið úr ráðuneytinu sem varðar svona persónulegt mál,“ segir Birgitta.

Birgitta segir málið lykta af pólitík og upplýsingarnar hafi verið settar fram til að sverta viðkomandi einstaklinga, karl og konu,  sem séu hælisleitendur á Íslandi. En karlinn var eftilýstur þar sem vísa átti honum úr landi. En gæti lekinn ekki komið annars staðar frá, t.d. frá Útlendingastofnun?

„Við þurfum bara að fá svör við því. Útlendingastofnun heyrir undir þetta ráðuneyti. Þannig að við getum vonandi fengið almennilegar upplýsingar um hvaðan þetta kemur og þeir sem eru ábyrgir fyrir því þá kallaðir til ábyrgðar,“ segir Birgitta.

Birgitta segir bæði lekann sjálfan og þær persónuupplýsingar sem lekið var alvarlegt mál.

„Og það sem mér finnst eiginlega ósmekklegast er að gefa í skyn að viðkomandi aðili sé ekki faðir barns,“ segir hún. Það sjái allir hvað þetta sé alvarlegt mál, ef til dæmis lekið hefði verið upplýsingum um Íslending í forræðisdeilu við milli landa.

En maður hefði haldið að Píratar og þá þar með þú, stydduð leka á gögnum?

„Það er gríðarlega mikill misskilningur á því hvers eðlis lekar eru. Ég er mjög hlynnt því að það ef það eru upplýsingar sem varða almannahag sé komið áleiðis. Segjum spillingarmál, eða eins og t.d. lánabók Kaupþings sem var mjög gagnlegt að gerð var aðgengileg blaðamönnum og öðrum sem höfðu vit á að rýna í þær upplýsingar,“ segir Birgitta. Allt öðru máli gegni um persónuupplýsingar sem snerti ekki almannahagsmuni.