Safna fartölvum fyrir fólk í Sambíu í kjölfar tölvuleitar fyrir Franciscu

Hafin er landssöfnun á notuðum fartölvum fyrir hjálparstarf í Sambíu. Söfnunin kemur í kjölfar ótrúlegra viðbragða við átaki Öldu Sigmundsdóttur sem leitaðist við að finna notaða tölvu fyrir Franciscu Mwansa, starfsstúlku í Bónus.

Fjölmargir buðu fram notaðar tölvur og mun Tölvulistinn taka á móti framlögum á höfuðborgarsvæðinu, Akureyri, Egilsstöðum, Keflavík og Selfossi. Tölvun í Vestmannaeyjum mun taka á móti tölvum þar.

Fartölvunar verða gefnar til skóla og heilbrigðisstofnana í heimahéraði Franciscu í Zambíu í samráði við trausta aðila þar í landi, eins og segir í tilkynningu frá forsvarsmönnum söfnunarinnar.

Verkefnið er unnið með stuðningi sambíska sendiherrans í Svíþjóð, Edith Mutale, og mun fulltrúi frá sendiráðinu koma hingað til lands að söfnun lokinni til að fylgja verkefninu eftir. Sendiráðið í Svíþjóð mun aðstoða við að koma fartölvunum til þeirra sem mest þurfa á þeim að halda.

Í tilkynningunni frá söfnunaraðilum segir að tölvukunnátta gefi fólki í Sambíu mikið forskot, en tölvuvæðing sé hafin þar eins og annars staðar. Ein fartölva sem legið hefur ónotuð uppi í skáp á íslensku heimili geti gjörbreytt lífi margra í Sambíu. Samkvæmt góðgerðarsamtökunum Computers 4 Africa sem vinna að tölvuvæðingu í Afríku geti ein tölva haft áhrif á líf allt að 24 einstaklinga.

Tölvulistinn og Tölvun munu vera miðstöðvar söfnunarinnar og jafnframt yfirfara þær tölvur sem berast. Þá hefur DHL boðist til að senda tölvurnar til Zambíu að kostnaðarlausu og aðstoða með tollamál gerist þess þörf. Dínamít, grafísk smiðja hefur gefið hönnun á merki og auglýsingu fyrir söfnunina. Umsjón með verkefninu hafa Gunnar Jónsson og Ásgerður Jóhannsdóttir í samvinnu við Öldu Sigmundsdóttur og Franciscu Mwansa.

Móttökustaðir:

Reykjavík - Suðurlandsbraut 26

Akureyri - Glerárgötu 30

Egilsstaðir - Kaupvangi 6

Keflavík - Hafnargötu 90

Selfoss - Austurvegi 34

Hafnarfjörður - Reykjavíkurvegi 66

Vestmannaeyjar - Strandvegi 51