Of mikill hávaði á Iceland Airwaves

Of mikill hávaði var á þremur tónleikastöðum af fjórum sem Heilbrigðiseftirlit Reykjavíkur mældi á tónlistarhátíðinni Iceland Airwaves sem haldin var í byrjun nóvember.

Fulltrúar á vegum Heilbrigðiseftirlitsins gerðu hljóðmælingar með „nýjum Brüel & Kjær hljóðmæli“ en samkomustöðum ber að fara eftir viðmiðunarmörkum sem gefin er upp í reglugerð um hávaða, að því er segir í tilkynningu frá eftirlitinu.

Viðmiðunarmörk fyrir leyfilegan hávaða á samkomustöðum, útiskemmtunum og öðrum stöðum, þar sem fólk dvelur í skamman tíma eru misjöfn. Jafngildishljóðstig er 95 desibil, hámarkshljóðstig 110 desibil og hæsti hljóðtoppur 130 desibil. Ef um er að ræða staði sem eru sérstaklega ætlaðir til tónleikahalds er leyfilegt að heimila í starfsleyfi hærra hljóðstig á einstökum viðburðum en þó skal jafngildishljóðstig aldrei fara yfir 102 desibil.

Varanleg heyrnarskemmd getur orðið á sekúndubroti ef hávaði fer yfir 140 desibil og ef hávaði fer yfir 115 desibil getur valdið varanlegum skemmdum.

„Á þeim stöðum sem hávaði fór yfir viðmiðunarmörk var farið fram á að dregið yrði úr hávaða tafarlaust og í kjölfar eftirlits var gerð krafa um að gerðar yrðu ráðstafanir til að hávaði innanhúss verði framvegis ekki yfir leyfilegum mörkum,“ segir í tilkynningu frá Heilbrigðiseftirlitinu.