Fjármálaráðherra blæs á gagnrýnina

Þingmenn stjórnarandstöðunnar fréttu fyrst af þingsetningu þegar að matseðill Alþingis var sendur út. Formaður Samfylkingarinnar gagnrýnir vinnubrögðin og vonar að þau séu ekki fyrirboði um það sem koma skal. Fjármálaráðherra blæs á gagnrýnina.

Ríkisstjórnin ákvað á fundi sínum á föstudaginn að sumarþing verði sett á fimmtudaginn. Stjórnarandstöðuþingmenn gagnrýna það að þeir hafi fyrst frétt af þessu þegar að matseðill Alþingis var sendur út í gær.

„Þegar að við sáum matseðilinn þá óskaði nú þingflokksformaðurinn eftir skýringum frá starfandi þingforseta og fékk þá að vita að það stæði til að setja þing á fimmtudaginn en það hefur enginn haft fyrir því að tala við okkur beint af fyrra bragði,“ sagði Árni Páll Árnason, formaður Samfylkingarinnar, í kvöldfréttum Stöðvar 2.

Bjarni Benediktsson fjármálaráðherra er starfandi forsætisráðherra þar sem að Sigmundur Davíð Gunnlaugsson er í Noregi.

„Það er nú allt eðlilegt þar sem að ákvörðun um þetta var tekin milli stjórnarflokkanna á föstudaginn og síðan þarf að klára formlegheit sem að gerði það að verkum að það var ekki hægt að tilkynna um þetta formlega fyrr en seinnipartinn í dag. Þannig að það er nú allt í eðlilegum farvegi,“ segir Bjarni, og bætir því við að heppilegt hefði verið að láta vita fyrr.

„Jú, jú ég held að það hefði verið heppilegt ef að við hefðum getað haft kannski bara ríkisstjórnarfundinn í beinni útsendingu þegar við ákváðum þetta á föstudaginn en svona gerast bara hlutirnir. Það vissu allir að það átti að kalla saman þing næstu daga það er engin töf á því að formleg tilkynning fer út.“

Þá segir Árni Páll að þingmenn minnihlutans hafi ítrekað óskað eftir því að fá fund með formönnum stjórnarflokkanna til að fara yfir hvernig málum verði háttað á sumarþinginu. Hann hafi fyrst í dag fengið staðfestingu á því að halda ætti fundinn og verður hann á morgun.

„Við skulum vona að þetta sé ekki fyrirboði um það sem að koma skal. Því að við þurfum á því að halda og ég held að þjóðin þurfi á því að halda að sjá annarskonar vinnubrögð á Alþingi heldur en að hafa tíðkast undanfarin misseri og ár. Við erum tilbúin í það fyrir okkar leyti og ég ætla að vona að stjórnarmeirihlutinn hafi bara verið að misstíga sig í upphafi núna og að menn taki það alvarlega að tala við fólk,“ segir Árni Páll.