My pussy is hungry stenst ekki málfarskröfur

Auglýsingadeild RÚV neitar að lesa inn auglýsingu fyrir nýja bók Hugleiks Dagssonar í samlesnum auglýsingum Rásar 1 og Rásar 2. Ástæðan er að auglýsingin uppfyllir ekki málfarskröfur en titill bókarinnar er My pussy is hungry.

Auglýsingatextinn sem sendur var til RÚV er: "Mjá, mjá, mjá. My pussy is hungry. Ókeybæ.

Samkvæmt skilyrðum fyrir birtingu auglýsingar hjá RÚV eru gerðar ríkar kröfur um málfar, sérstaklega í auglýsingum sem lesnar eru af þulum RÚV, og áskilur RÚV sér rétt til að hafna auglýsingum sem fullnægja ekki málfarskröfum.

Kristrún Heiða Hauksdóttir, kynningarstýra Forlagsins, segir að ekki sé enn kominn botn í málið en unnið sé að því að finna útgáfu sem allir eru sáttir við.

„Þessi titill vafðist líka fyrir okkur en er orðinn okkur nokkuð tamur núna. Hann hefur verið uppspretta mikilla vangaveltna og húmors. Við höfum til dæmis fengið undarlegar augngotur og kómískar athugasemdir frá þjónustuaðilum út í bæ eins og prenturum, grafískum hönnuðum og yfirlesurum. Það er aðallega vegna tölvupóstsendinga þar sem fólk hnítur um titil tölvupóstsins, My pussy is hungry. Sérstaklega þegar tölvupósturinn kemur frá konu," segir Kristrún.

Kristrún segir titilinn hafa tvíræða merkingu enda vísi orðið pussy til bæði kattar og kvenlíffæris.