"Vil ekki búa í landi þar sem borgararéttindi eru til sölu"

Persónuvernd stendur enn við fyrri athugasemdir á umdeildu frumvarpi um Hagstofu Íslands sem áætlað er að verði að lögum á septemberþinginu. Gagnasöfnun sem mun nýtast við að leysa skuldavanda heimilinna, segir stjórnarþingmaður. Göfugur tilgangur trompar ekki brot á friðhelgi einkalífsins, segir þingmaður Pírata.

Forsætisráðherra lagði fram frumvarpið á sumarþingi en afgreiðslu þess var frestað til septemberþingsins. Samkvæmt frumvarpinu fær Hagstofa Íslands tímabundna heimild til að vinna tölfræðiskýrslur um skuldastöðu einstaklinga og fyrirtækja.

Hagstofan kallar eftir gögnum um stöðu lána hjá einstaklingum og lögaðilum frá fyrirtækjum og opinberum aðilum sem stunda lánastarfsemi, til að mynda frá Íbúðalánasjóði, LÍN, lífeyrissjóðunum og viðskiptabönkum.

Þessi gögn eru síðan samkeyrð með upplýsingum frá Skattstofunni.

Úr þeim gögnum vinna síðan stjórnvöld um hvaða aðgerðir hafa heppnast og hvaða skref skuli taka í framhaldinu. Þannig verði aðgerðir í skuldavanda heimilanna markvissari og líklegri til árangurs.

Þingmaður Pírata hefur margt út á frumvarpið að setja og telur það þrátt fyrir göfugan tilgang, meingallað.

"Auðvitað eru þetta gagnlegar upplýsingar, það vantar ekki en það eru ástæður fyrir því að það eru til borgararéttindi, það er til þess að setja ríkinu eðlilegar takmarkanir."

Í athugasemdum persónuverndar við frumvarpið segir meðal annars.

Persónuvernd hefur efasemdir um nauðsyn þess að komið sé á fót opinberum gagnagrunni með jafn víðtækum persónuupplýsingum og hér um ræðir til þess að grípa megi til aðgerða til að greiða úr fjárhagsvanda fjölskyldna og einstaklinga. Í frumvarpinu skortir útskýringar á því hvers vegna þörf er talin á svo viðurhlutamiklum afskiptum af friðhelgi einkalífs.

Unnið er að því hjá allsherjarnefnd að sætta ólík sjónarmið.

"Það sem að vinna nefndarinnar og Alþingis gengur út á er þá að meta það, hvort það skipti almenning meira máli að þessar traustu upplýsingar verði til eða þá að einstaklingar láti þessar upplýsingar ekki af hendi í gegnum bankana"

"Ef hagtölur þykja nógu góð ástæða til að trompa friðhelgi einkalífsins, þá velti ég fyrir mér, hvaða ástæða er ekki nógu góð? Hvar mun þetta stoppa? Svarið er hvergi."

Margir hafa eflaust þá sýn á frumvarpið að ef það hjálpar til við að lækka skuldir heimilanna, er það þá ekki réttlætanlegt?

"Ef fólk vill selja borgararréttindi sín þá vil ég ekki búa í sama landi."