Benedikt syndir Alcatrazsundið

Benedikt Hjartarson sundkappi ætlar að synda Alcatrazsund með tveimur félögum sínum þann 28. júlí næstkomandi. Sundið er á milli hins þekkta fangelsis og San Fransisco í Bandaríkjunum.

„Þetta er gert í tilefni þess að félagi okkar, Jón Sigurðsson er svona í fullorðnari kantinum. Hann varð sextugur fyrir stuttu og var búinn að finna út að það gæti verið skemmtielgt að synda Alcatrazsundið," segir Benedikt í samtali við Vísi. Auk Benedikts og Jóns mun Árni Þór Árnason synda. Benedikt segir að þeir hafi komist að því að 12. júní síðastliðinn hafi akkúrat verið liðin 50 ár frá því að Frank Morris og Englishbræður flúðu úr Alcatraz. Það væri þess vegna kjörið tækifæri að ráðast í sundið núna. „Clint Eastwood gerði alveg rosalega góða mynd sem fylgir alveg sögunni. Ég er búinn að vera að stúdera söguna svolítið núna," segir Benedikt.

Leiðin sem þeir munu synda er fjórir kílómetrar í loftlínu en vegna mikilla strauma getur verið að sundleiðin fari allt upp í sjö til átta kílómetra. Benedikt býst við því að sundið muni taka um einn til einn og hálfan klukkutíma. Benedikt er eini Íslendingurinn sem hefur lokið sundi yfir Ermasund. Sú reynsla mun nýtast honum vel í Alcatrazsundinu. „Þetta er straumhart og þetta er kalt," segir Benedikt. Hann bætir því við að þetta sund hafi oft verið synt. „En það eru mjög fáir sem hafa synt þetta á sundskýlunni eins og við ætlum að gera," segir Benedikt. Benedikt vinnur ötullega að því að koma sér í form þessa dagana og syndir tvisvar á dag í Nauthólsvík.

Sundið er ekki hættulaust því að sögur segja að þarna í sjónum séu hákarlar. „Nú eru þetta allt saman bara sögusagnir sem ég hef ekki staðfest," segir Benedikt. Hann bendir á að auk sögusagna um hákarla sé talað um að þarna geti verið þvottabirnir sem geti verið árásargjarnir á sínu heimasvæði.

Tilgangurinn með ferð þremenninganna er meðal annars að kynna Ísland sem áhugaverðan viðkomustað fyrir sjósundmenn. „Við erum svona að reyna að markaðssetja Ísland sem áhugaverðan stað til að synda á," segir Benedikt. Hann segir að mikið af sundfólki sé að leita sér að áhugaverðum áfangastöðum. Nefnir Benedikt sem dæmi að hægt sé að kynna Drangeyjarsund og Viðeyjarsund sem áhugaverðar áskoranir fyrir erlenda sundmenn.