Útvega Skúla fógeta félagskap

Þriggja manna hönnunarteymi hefur tekið Fógetagarðinn í miðbænum í gegn og lífgað upp á torgið með tiltækum ráðum. Opnun á verkinu fer fram á morgun milli klukkan þrjú og fimm.

Að eigin sögn kenndu þau í brjósti um Skúla fógeta þar sem hann stóð sífellt einn á miðju torginu og borgarbúar hirtu ekkert um að staldra við hjá honum. Þessu ætlar hönnunarteymið Himinn og Haf breyta með svífandi strengjaskúlptúr, öðruvísi setuaðstöðu og ýmsum uppákomum.

Í fógetagarðinum er sólríkt og skjólgott. Þar er að finna elsta tré í Reykjavík auk þess sem tugir kynslóða Reykvíkinga liggja grafnar undir hellunum, enda var þarna kirkjugarður fyrr á tímum. Hönnunarteymið vill því koma núverandi Reykvíkingum í nánari félagskap við þessa framliðnu anda og létta um leið einsemd Skúla fógeta.

Hönnunarvinnan er unnin í samstarfi við Reykjavíkurborg sem hluti af verkefninu Torg í biðstöðu sem felur í sér tilraunir með almenningsrými.