Segir barnabörnin hafa þjáðst af illum öndum

Íslenskur maður, sem Sunnudagsblað Morgunblaðsins ræddi við, fullyrðir að tvö barnabörn sín hafi verið andsetin af illum öndum. Maðurinn, sem kemur ekki fram undir nafni í viðtalinu, segir að hann hafi notið liðsinnis íslensks manns, sem hafi rekið andana úr börnunum, fyrir um tveimur árum síðan.

Það er óhætt að segja að viðtalið við manninn sé hrollvekjandi. Maðurinn lýsir því þannig að hann hafi farið ytra til þess að aðstoða dóttur sína, einstæða tveggja barna móður, við að flytja á milli staða. Í viðtalinu kemur ekki fram í hvaða landi konan býr, en hún býr í dreifbýli í landi í Evrópu, sem er kallað Holland í greininni.

Börnin tvö, stúlka og drengur, voru fimm og þriggja ára gömul þegar atvikið átti sér stað samkvæmt frásögninni.

Fyrstu teikn um að undarlegir hlutir væru að gerast á heimilinu að sögn mannsins, sem er kallaður Bjarni í viðtalinu, var þegar hann veitti því eftirtekt að dóttir hans, móðir barnanna, var með hvítt bitfar á bol sínum. Líkt og einhver skepna hefði glefsað í hana. Þessu til sönnunar má finna mynd í blaðinu af bitfarinu.

Í kjölfarið fóru börnin að umbreytast. Stúlkan fór að vakna grátandi á næturnar og var óhuggandi. Og þá vill Bjarni meina að kviður stúlkunnar hafi gengið í bylgjum, en sjálfur taldi hann og dóttir hans að stúlkan væri að fá krampa. Kettinum á heimilinu stóð einnig stuggur af stúlkunni.

Fleiri sérkennileg atvik bættust við. Þannig fóru undarlegir hlutir að heyrast, óútskýrð þensluhljóð í húsinu, en kallað var á pípulagningarmann sem fann ekkert athugavert við pípulagnir hússins að sögn Bjarna.

Ástandið stigmagnast og stúlkan virðist vera í verra ásigkomulagi heldur en drengurinn. Þannig lýsir Bjarni því, sem virðist vera mjög trúaður maður, að stúlkan hafi brugðist mjög illa við tilraunum hans til þess að fara með bænir. Þá hafi hún skipað honum að halda kjafti þegar hann fór með faðirvorið í hljóði nálægt henni.

Svefnvenjur barnanna breyttust algjörlega. Þau sváfu í örfáar klukkustundir að sögn Bjarna en sátu þess utan hljóð í rúmum sínum. Þá lýsir Bjarni augum þeirra þannig að sjáöldrin haf verið útþanin og augun gulleit.

Frásögnin nær svo hámarki þegar Bjarni fer með fjölskylduna á uppáhaldsveitingastað barnanna í Hollandi. Þar umbreytist stúlkan algjörlega, gengur nokkurnveginn sturluð á milli borða, rekur út úr sér tunguna og sýndi fólki á víxl þumalfingurinn eða djöflahornin.

Bjarni lýsir því svo á leiðinni til heim af veitingahúsinu hafi stúlkan verið orðin óþekkjanleg í framan.

Að lokum kom fjölskyldan aftur til Íslands, þar sem Bjarni komst í kynni við mann, sem segist áður tekist á við slíkar óværur. Einnig er rætt við hann í viðtalinu í Sunnudagsblaðinu, en þar segist hann hafa rekið út tvo illa anda úr stúlkunni með bænum.

Bæði börnin eru í lagi í dag samkvæmt Bjarna. Hann fullyrðir einnig að þau hafi ekki orðið fyrir neinum skaða vegna hinna meintu andsetningar.

Maðurinn sem særði andana út segir í viðtali við blaðið að tilfellið sé ekki það fyrsta sem hann tekst á við, né það versta

Blaðið má nálgast hér.