Selur burstabæi undir beru lofti í Salahverfi

„Ég hef skárra út úr þessu en ellistyrknum,“ segir Jón Karlsson, 74 ára líkanasmiður með meiru, sem selur burstabæi á víðavangi í Kópavogi.

Jón, sem býr í þjónustuíbúð á Vesturgötu 7 í Reykjavík, fer stundum upp í Salahverfi í Kópavogi og kemur sér fyrir undir beru lofti til að selja bæina sína eins og vegfarendur þar hafa tekið eftir. Hann segir tvær ástæður fyrir staðarvalinu.

„Ég hef selt ágætlega þar, bara einu sinni farið heim með öngulinn í rassinum og svo er þægilegt að leggja bílnum þarna. Þá er maður ekki að trufla umferð. Ég er alltaf skíthræddur um að gera einhverja skandala,“ segir hann.

Smíðavinnan var ávallt aukastarf hjá Jóni. „Ég þvældist mikið um og hef víða komið við, var mest við akstur og var í netagerð austur á fjörðum. En nú er eiginlega aðalstarfið hjá mér að smíða skipslíkön,“ segir Jón.

Burstabæina segir Jón fólk til dæmis hafa á veröndunum, í görðum og við sumarhús. Þá sé hægt að fá með ljósum. „Fólk heldur eiginlega ekki vatni yfir því hvað þetta er flott,“ segir Jón spurður um viðbrögðin. „Ég hef bara einu sinni fengið kvörtun,“ bætir hann við. „Hún var vegna þess að ég hafði fengið skemmt efni. Ég bara lét fólkið fá annað hús.“

Jón hyggst ekki standa mikið við næstu daga í Salahverfinu. „Ég verð mest með þetta heima. Svo flakka ég líka mikið, fer upp á Akranes og jafnvel hringinn í kringum landið,“ segir Jón og tekur skýrt fram að hann annist sjálfur söluna á sinni framleiðslu.

„Ef þú smíðar bæi og lætur annan selja fyrir þig þá færð þú tíu þúsund krónur en hinir tuttugu þúsund fyrir að rétta þá yfir búðarborðið. Það kæri ég mig ekki um.“ Sjálfur selur hann húsin á 16.500 krónur.

Jón smíðar fleira en skip og hús. „Mér dettur svo margt í hug sem óbrjáluðum manni hefði ekki dottið í hug,“ segir Jón, sem kveðst meðal annars hafa hannað burstabæi til að hylja lok á rotþróm auk þess að smíða fallbyssur eins og í sjóræningjaskipunum. „En ég vil bara ekki selja mikið af þeim fyrr en ég er búinn að prófa þær niðri við Alþingishús,“ segir hann hlæjandi.