Kreppan bjó í haginn fyrir umbótastarf

Dr. Gianandrea Falchi, framkvæmdastjóri hjá Seðlabanka Ítalíu, segir að þó fjármálakreppan hafi haft alvarleg áhrif hafi hún neytt evruríkin til að horfast í augu við óþægilegar staðreyndir. Upplausn og erfiðleikum hafi fylgt vilji til umbóta.

Vandræði evrusvæðisins eru ekki að baki, en það versta er sennilega yfirstaðið. Þetta segir dr. Gianandrea Falchi, framkvæmdastjóri hjá Seðlabanka Ítalíu, í samtali við Fréttablaðið. Hann var með framsögu á málþingi um reynslu evruríkjanna og Íslands í fjármálakreppunni í gær.

„Kreppan var sennilega líka vanmetin í upphafi þar sem hún hefur nú staðið yfir í fimm ár, sem er afar langur tími,“ segir Falchi en bætir því við að hún hafi þó haft ýmsar jákvæðar afleiðingar.

„Þó að fjármálakreppan hafi vitanlega haft afar alvarleg áhrif neyddi hún okkur Ítali til að horfast í augu við staðreyndir og hefja nauðsynlegar umbætur.“

Hið sama segir hann gilda um evrusvæðið í heild þar sem meðal annars var ákveðið í fyrrinótt að samræma reglur og eftirlit með bankastarfsemi.

Aðspurður um muninn á stöðu Íslands og Ítalíu eftir hrun, þar sem Ísland hafði eigin mynt og Ítalía var með evru, segir Falchi að sé horft til þróunar efnahagsmála í löndunum tveimur sé samanburðurinn Íslandi í hag. Hagvöxtur sé hafinn á ný á Íslandi, meðal annars vegna þess að Ísland hefur eigin mynt, en Ítalía horfi enn fram á samdrátt þangað til á næsta ári.

„Aðstæðurnar eru hins vegar ólíkar þar sem Ítalía er mun nátengdari mörkuðum í Evrópu, en við þekkjum þessa hluti frá fyrri tíð. Áður en við tókum upp evruna einkenndist efnahagslífið af sveiflum. Erfiðleikar kölluðu á gengisfellingu lírunnar sem efldi útflutning og stuðlaði þannig að hagvexti, en innan þriggja eða fjögurra ára hafði verðbólga stóraukist og stýrivextir hækkað. Ábatinn af slíku var því enginn til lengri tíma og með aðild að myntbandalaginu tókum við ákvörðun um að segja skilið við slíkt.“

Hann segir að vissulega hafi almenningur á Ítalíu mátt taka á sig auknar byrðar, en andstaðan við aðhaldsaðgerðir hefur ekki verið neitt í líkingu við það sem gerst hefur í Grikklandi.

„Svo sjáum við hins vegar evruríkið Írland, sem varð afar illa úti í hruninu, og gat ekki beitt gengisfellingu, en Írum hefur hins vegar auðnast að snúa aftur á braut hagvaxtar. Þannig er ekki hægt að benda á eina lausn í þessum málum.“

Falchi segir, spurður um horfurnar á Ítalíu næstu misseri, að hann óttist ekki framvinduna þrátt fyrir að þingkosningar verði í febrúar og óvíst hverjir taki við völdum.

„Markaðirnir skilja að landið er á réttri leið og trúa því að óháð því hvernig stjórn taki við, muni hún fylgja stefnunni sem hefur verið mörkuð.“thorgils@frettabladid.is