Rektor segir spegla bæta andrúmsloftið

Búið er að sækja um nýtt byggingarleyfi vegna glerveggs á austur- og vesturhlið Menntaskólans í Reykjavík. Rektor segir breytingarnar bæta aðstöðu í skólanum til muna. Leyfið var afturkallað í haust vegna óæskilegrar speglunar af veggnum.

„Nú í haust ræddu menn um gjörbreyttar aðstæður – allt annað líf, bæði hvað varðar töflunotkun og ekki síst þar sem litaða glerið heldur sólargeislum að miklu leyti úti. Það hefur verið okkur sérstaklega ánægjulegt að svona vel tókst til,“ segir í umsögn Lindu Rósar Michaelsdóttur, rektors Menntaskólans í Reykjavík, til skipulags- og byggingasviðs Reykjavíkurborgar um hinn nýja glervegg skólans við Þingholtsstræti 18.

Linda segir alla aðstöðu fyrir framkvæmdirnar hafa verið erfiða bæði nemendum og kennurum. „Illa gekk að nota töflur og skjávarpa ef sólin skein og ef gardínur voru dregnar fyrir myndaðist algjörlega óviðunandi hitamolla í bæði kennslustofum og vinnustofum sem snúa út að Þingholtsstrætinu.“

Fréttablaðið greindi frá því í haust að byggingarleyfi fyrir umræddum framkvæmdum, sem fela mestmegnis í sér uppsetningu nýs gler- og álveggjar á austur- og vesturhlið skólans, var afturkallað vegna gagnrýni íbúa í nágrenninu. Veggurinn hafi virkað eins og spegill sem varð til þess að nágrannarnir hafi nánast horft beint inn um glugga hver annars, auk þess sem þeir voru „berskjaldaðir gagnvart gangandi umferð“.

Ekkert grenndarmat var gert á framkvæmdunum og var því úrskurðað að endurnýja leyfisferlið. Nú hefur svo verið gert.

Rektor óskar eftir því í umsögn sinni að byggingarleyfið verði samþykkt, þó hún taki það fram að skipulagsmál á svæðinu séu í raun ekki mál skólans.

Helgi Hjálmarsson skrifar umsögn fyrir hönd hönnuða veggjarins að fyrir liggi að talsverð speglun hafi verið af veggnum fyrir framkvæmdirnar og ættu þetta því ekki að vera miklar breytingar.

Umsókn um nýtt byggingarleyfi var lögð fram þann 23. nóvember síðastliðinn.sunna@frettabladid.is