Sanna tollgreiðslur með kortayfirliti

Kvittanir eru langalgengasta leiðin sem ferðamenn nota til að færa sönnur á að þeir hafi keypt tollskyldan varning hér á landi. Einnig er hægt að framvísa kreditkortayfirliti og þá getur tollurinn fengið upplýsingar frá raftækjaframleiðendum um hvort raðnúmer viðkomandi tækis svarar til vöru sem var seld á Íslandi.

Fréttablaðið hefur að undanförnu fjallað um tollaeftirlit í Leifsstöð. Hinn 10. nóvember var fjallað um reglurnar sem um eftirlitið gilda og hinn 28. nóvember um þau viðurlög sem eru við smygli í gegnum tollinn.

Sé einstaklingur stoppaður af tollvörðum í Leifsstöð getur viðkomandi þurft að sýna fram á að dýr varningur sem hann hefur meðferðis sé keyptur hér á landi og því þegar búið að greiða af honum toll.

„Við förum fram á að fólk sanni eignarrétt sinn á viðkomandi hlutum. Hafi fólk kvittanir ekki meðferðis ráðleggjum við því að fara í umboðin hér heima og fá nótur enda eru þau sum með skrár yfir seldar vörur,“ segir Kári Gunnlaugsson, yfirtollvörður á Keflavíkurflugvelli, og bætir við: „Fólk getur einnig prentað út kreditkortayfirlit og fært okkur. Þá er fólk stundum tekið í skýrslutöku og ég held að það sé ekki mikið að ljúga að okkur þar. Þessi mál eru flest leyst á þann máta að sannleikurinn er leiddur í ljós.“

Geti einstaklingar ekki fært sönnur á að þeir hafi keypt varning innanlands með kvittunum eða kreditkortayfirliti er þó eitt ráð enn til staðar. „Ef mál fara lengra getum við sent fyrirspurn á fyrirtæki, eins og til dæmis Apple, varðandi raðnúmerið sem þeirra raftæki og flest önnur bera. Þannig er stundum hægt að rekja hvar varan var seld. Við höfum hins vegar ekki aðgang að neinum gögnum um slíkt enda væri það ekki leyfilegt samkvæmt persónuverndarlögum, sem við fylgjum í hvívetna,“ segir Kári.

magnusl@frettabladid.is