Vildu ekki færa Þorláksbúð til

Kirkjuþing felldi tillögu séra Baldurs Kristjánssonar um tilfærslu Þorláksbúðar. Baldur vildi að húsið yrði tekið niður og geymt þar til hentugur framtíðarstaður fyndist.

?Í þeim efnum verði horft til áforma um byggingu miðaldadómkirkju/safnahúss í nágrenni Skálholts en þar yrði væntanlega hið kórrétta umhverfi fyrir þetta fallega og vel byggða hús,? segir í þingsályktunartillögu Baldurs. Í greinargerð tillögunnar kemur fram að í ljós hafi komið að Þorláksbúð hafi ekki verið afhent kirkjunni, en á meðan hún standi á núverandi stað sé hún samt á ábyrgð hennar, bæði fjárhagslega og rekstrarlega.

Allsherjarnefnd fjallaði um málið og lagði til að tillagan yrði felld. Fjöldi mála var afgreiddur á þessu Kirkjuþingi, sem var frestað um hádegisbil á fimmtudaginn. Meðal annars var ákveðið að sameina Patreksfjarðarprestakall og Tálknafjarðar- og Bíldudalsprestakall, sem mun þá fá heitið Patreksfjarðarprestakall um áramótin þegar sameiningin tekur gildi.

Þá var meðal annars kosið í nýjar nefndir Kirkjuþings, rætt um val og veitingu prestsembætta, hlunnindagreiðslur af kirkjujörðum og reynsla af sameiningum prófastsdæma metin.- sv