Atvinnulausum innflytjendum fækkaði um 57% á 9 mánuðum

Atvinnuleysi meðal fólks af pólskum uppruna á Íslandi mælist nú 15% á sama tíma og atvinnuleysi almennt mælist 5,8%. Þetta er umhugsunarefni – og að nokkru leyti áhyggjuefni um leið. Ef ekki verður brugðist við þessu sérstaklega er hætta á því að Pólverjar, og innflytjendur almennt, myndi til framtíðar minnihlutahóp sem býr við skertari tækifæri til atvinnuþátttöku en innfæddir Íslendingar.

Á fyrri hluta þessa árs vann Akraneskaupstaður, í samvinnu við Vinnumálastofnun á Vesturlandi, Rauða krossinn á Akranesi og Símenntunarmiðstöð Vesturlands, með styrk úr Þróunarsjóði Innflytjendamála, verkefni sem miðaði að því að draga úr atvinnuleysi innflytjenda. Þegar verkefnið hófst var atvinnuleysi meðal innflytjenda um 20% meðan heildaratvinnuleysi var 3,2%. Áhersla var lögð á að hámarka möguleika atvinnulausra innflytjenda til þess að nýta sér hefðbundin og almenn úrræði sem standa atvinnulausum til boða og tryggja að þessi hópur yrði ekki útundan í átaksúrræðum. Einnig var áhersla lögð á að nýta frumkvöðla og nýsköpunarkraft innflytjenda.

Þessi markmið náðust dável:

Í maílok hafði atvinnulausum innflytjendum fækkað úr 46 í 38 (17% fækkun).

3 einstaklingar höfðu nýtt sér atvinnuráðgjöf hjá Akraneskaupstað og af þeim hafa tveir hrint viðskiptahugmynd í framkvæmd; annars vegar er um að ræða fyrirtæki sem sérhæfir sig í markaðssetningu á íslensku sælgæti fyrir ferðamenn og hins vegar fyrirtæki sem flytur inn varahluti í bíla frá Póllandi.

4 einstaklingar fóru í vinnu í gegnum átak Vinnumálastofnunar: Vinnandi vegur.

11 einstaklingar fengu starfsráðgjöf hjá Vinnumálastofnun á Vesturlandi, komu ýmist í eitt viðtal eða fleiri.

7 einstaklingar af erlendum uppruna fengu tímabundin störf í gegnum atvinnuátaksverkefni Akraneskaupstaðar.

19 einstaklingar fengu náms- og starfsráðgjöf hjá Símenntunarmiðstöðinni á Vesturlandi – komu í eitt viðtal eða fleiri.

30 einstaklingar sóttu íslenskunámskeið á tímabilinu.

27 einstaklingar stunduðu nám í Landnemaskóla I og II. Hluti af námi í Landnemaskóla er að fara inn á vinnustaði í talþjálfun einu sinni í viku. Hluti nemenda fékk í kjölfarið vinnu á viðkomandi vinnustað.

Einnig hafa atvinnuleitendur af erlendum uppruna verið duglegir við að nýta sér ýmis önnur úrræði, s.s. ókeypis aðgengi í líkamsrækt og á Bókasafnið, þó að nákvæmar tölur þar að lútandi liggi ekki fyrir.

Þó að verkefninu hafi lokið formlega í júní hafa þeir sem að því stóðu haldið áfram og náð enn betri árangri, enda gaf aðferðin sem beitt var góða raun. Í septemberlok eru atvinnulausir innflytjendur á Akranesi 19 talsins, þar af 11 frá Póllandi, sem þýðir að fækkað hefur í hópi atvinnulausra innflytjenda um 27, eða 59%. Því má ljóst vera að verulegur árangur hefur náðst á Akranesi frá því að verkefnið hófst í byrjun þessa árs. Með samstilltu átaki er hægt að sporna við þessari óheillaþróun.