Verndar ESB Vestmannaeyjar?

Össur Skarphéðinsson er mikill maður í mörgum skilningi þeirra orða. Væri hann söguhetja í skáldsögu væri honum sennilega lýst sem hnyttnum og kankvísum karli sem öllum vill vel. Ekki er ólíklegt að í persónulýsingu væri tekið fram að sjaldnast léti hann sannleikann skemma góða sögu. Sem slíkur er Össur í miklu uppáhaldi hjá okkur Eyjamönnum og fáa fáum við skemmtilegri í heimsókn. Í hvívetna hefur hann sýnt okkur skilning og vikið að okkur hlýjum orðum og góðum gjörðum.

Gamansemi þessa vinar okkar náði nýjum hæðum nú fyrir skömmu þegar hann lýsti því í viðtali við fjölmiðla að Evrópusambandið ætlaði að vernda okkur Eyjamenn gegn hinum vondu útgerðarmönnum sem hér störfuðu. Af orðum hins hnyttna ráðherra að dæma þurftum við víst sérstaka vernd fyrir því að „kvótagróði gæti farið í fótboltafélög og dagblöð uppi á landi“. Það sem vakti bros okkar var sú hnyttni ráðherrans að ætla sér að koma í veg fyrir kvótagróða með því að fara einfaldlega með okkur inn í Evrópusambandið, sem rekur sjávarútveg sem er óarðbær og því engin von um „kvótagróða“, hvorki í eitt né annað.

Hitt er svo annað að það er gott að vita af hlýjum hug Össurar og slíkt skal ekki vanþakkað. Hann veit sem er að þótt höggið sem fylgir bæði sölu á bátum og kvóta úr sveitarfélögum sé mikið er það fyrst og fremst ríkisstjórnin sem hefur kostað okkur Eyjamenn arð, kvóta og störf sem slíku fylgir. Okkar góði vinur Össur veit að á yfirstandandi fiskveiðiári tekur ríkið af okkur Eyjamönnum aukalega 1.240 þorskígildistonn með reglugerðarbreytingu. Þetta verður til þess að samtals fara frá Vestmanneyjum rúm 4.000 þorskígildistonn í potta á þessu fiskveiðiári. Til samanburðar kemur hið mikla högg sem við verðum fyrir ef Síldarvinnslan/Samherji kaupir Berg-Huginn til með að kosta okkur um 5.000 þorskígildistonn. Þá á ég óupptalið veiðigjaldið sem ríkisstjórnin hefur nú hvolft yfir okkur og skall á 1. október. Það nemur um 2.700 milljónum, bara fyrir Vestmannaeyjar. Fyrir þessi verðmæti væri hægt að kaupa eina útgerð eins og Berg-Huginn á ári til Vestmannaeyja.

Í Össuri eigum við góðan bandamann. Rétt eins og hann vill vernda okkur fyrir kvótagróða með því að innleiða óarðbæra sjávarútvegsstefnu ESB mun hann vafalaust finna vörn gegn ríkisstjórn Íslands í hlýjum faðmi Brussel. Innan skamms kemur Össur því vonandi heim til Íslands með þær góðu fréttir að vinir hans í ESB muni vernda Eyjamenn fyrir því sem veldur þeim mestum skaða, sem sagt ríkisstjórn Íslands.