Sjónvarpsrásum fjölgað um þrjár hjá Stöð 2

Miklar breytingar verða gerðar á Stöð 2 frá og með deginum í dag. Þrjár nýjar sjónvarpsstöðvar verða kynntar til leiks.

„Þetta eru mjög líklega mestu breytingar sem hafa orðið á Stöð 2 frá upphafi,“ segir Pálmi Guðmundsson, framkvæmdastjóri dagskrársviðs 365.

Frá og með deginum í dag fylgja þrjár nýjar og ólíkar sjónvarpsstöðvar áskrift af Stöð 2, auk þess sem Stöð 2 Bíó verður enn til staðar með óbreyttu sniði. Nýju stöðvarnar eru Popptíví, Stöð 2 Gull, sem býður upp á úrval klassískra sjónvarpsþátta, og Stöð 2 Krakkar þar sem barnaefni verður í gangi alla daga frá morgni til kvölds. Þjónusta Stöð 2 Extra fer aftur á móti yfir í Netfrelsi.

Allir munu fá eitthvað við sitt hæfi og að sögn Pálma verður úrvalið mikið. „Gulldagskráin okkar mun líklega höfða til eldri áhorfenda, Popptíví mun þjónusta unglingana og Stöð 2 mun bjóða upp á mjög metnaðarfulla innlenda dagskrárgerð í vetur. Og krökkunum verður einnig sinnt mjög vel á Stöð 2 Krakkar. Svo verðum við með bætt Netfrelsi, sem er sjónvarpsefni eftir pöntun,“ segir Pálmi.

Undanfarna mánuði hefur áskrifendum Stöðvar 2 staðið til boða að horfa á alla helstu þætti stöðvarinnar á Netfrelsinu, allt að tvær vikur aftur í tímann. Nú hefur þessi þjónusta verið stóraukin með fjölbreyttara úrvali af nýju og eldra efni í bland. Frumsýndir sjónvarpsþættir á Stöð 2 verða nú aðgengilegir áskrifendum á Netfrelsinu í fjórar vikur. Einnig verða í boði tugir kvikmynda hverju sinni og verður framboðið uppfært reglulega.

Um er að ræða nýlegar gæðamyndir sem hægt verður að horfa á í tölvunni, spjaldtölvunni eða farsímanum. Íslenskar þáttaraðir sem sýndar hafa verið á Stöð 2 í gegnum tíðina verða einnig í fyrsta sinn gerðar aðgengilegar áskrifendum á netinu.

Aðspurður hvers vegna ráðist er í þessar breytingar núna segir Pálmi: „Við viljum auðvitað vera í fararbroddi þegar kemur að tækninýjungum. Við erum að bregðast við breyttu neyslumynstri áhorfenda. Þeir eru farnir að sækja sér sjónvarp eftir pöntun í stað þess að horfa á svokallaða línulega dagskrá. Þessar breytingar ættu að bæta til muna gæði þjónustu okkar gagnvart áskrifendum okkar og laða til okkar nýja viðskiptavini.“

freyr@frettabladid.is