Innlent

Ferðamenn bíða í röð við leiði Fischers

Englendingur sem var hér á ferð í sumar þurfti að bíða í rúma klukkustund til að komast að leiði Fischers. Fjöldi ferðamanna stóð í biðröð til að láta mynda sig við leiðið. fréttablaðið/pjetur
Englendingur sem var hér á ferð í sumar þurfti að bíða í rúma klukkustund til að komast að leiði Fischers. Fjöldi ferðamanna stóð í biðröð til að láta mynda sig við leiðið. fréttablaðið/pjetur
Það er ekki hægt að segja annað en að það sé töluverð umferð. Það eru alltaf þó nokkrir bílar og ein til tvær rútur á dag sem koma við,? segir Halldór Þórarinsson, sem býr að Laugardælum. Leiði Bobby Fischers er orðinn vinsæll áfangastaður ferðamanna.

Haraldur segir jákvætt að fólk komi og votti Fischer virðingu sína, á meðan það veldur ekki truflun eða ónæði. "Það hefur ekki gert það. Þetta er bara kurteist og almennilegt fólk þannig að það er ekkert nema jákvætt um þetta að segja."

Guðmundur G. Þórarinsson skákáhugamaður hefur orðið var við þennan mikla áhuga. "Vinur bróður míns, Englendingur, var hér á ferð og langaði að fara að leiðinu. Það voru þrjár rútur á undan honum og biðröð og hann þurfti að bíða í meira en klukkutíma til að komast að. Fólk var í biðröð til að taka af sér myndir við leiðið."

Kristján Ágúst Friðfinnsson, sóknarprestur á Selfossi, segir fjölda fólks koma við í Selfosskirkju og spyrja vegar að Laugardælum. "Frá mínum bæjardyrum séð er þessi áhugi mjög jákvæður."

Guðmundur segir að BBC hafi valið einvígi Fischers og Spasskys sem einn af 10 merkilegustu viðburðum síðustu aldar. Það sé stórmerkilegt, þegar horft sé til þess að verið sé að bera það saman við 2 heimsstyrjaldir, kjarnorkusprengjur og rússnesku byltinguna, svo eitthvað sé tínt til. Hann saknar þess að meira sé úr því gert.

"Þegar ég var á ferð í Arles í Frakklandi gekk ég þar eftir einhverri götu og sá að það var mikið að gerast inni í húsasundi. Ég fór þar inn og fólkið sagði við mig að það væri álitið að van Gogh hefði skorið af sér eyrað þarna. Þarna var allt fullt af ferðamönnum og menn voru að kaupa alls konar kort og ýmislegt."

Guðmundur telur vannýtta möguleika hér á landi, í ljósi áhuga ferðamanna á gröf Fischers. "Ferðamenn kvarta yfir því að geta ekki fengið póstkort, ekki myndir af Fischer eða Spassky eða neitt."

Halldór segir að komið hafi til tals að koma upp einhverri aðstöðu eða sölu fyrir ferðamenn, en ekki hafi orðið af því. "Hann velur sér þennan stað á vissan hátt til að fá að vera í friði. Það væri ekki beinlínis í hans anda að ætla að fara að gera eitthvað, nema það væri þá með fullri vinsemd og virðingu þeirra sem næst honum eru."

kolbeinn@frettabladid.is



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.