Börn ekki afskiptalaus á gæsluvelli í Setbergi

Ég er fjögurra barna móðir og er yngsta mín búin að sækja gæsluvöllinn í Setbergi þar sem börn frá 2 til 5 ára koma saman og leika sér. Þarna eru börn frá alls kyns heimilum og verða foreldrar að meta börn sín sem eru kannski aðeins 2 ára hvort þau séu hæf eða tilbúin til að fara á gæsluvelli með eldri börnum í allt að 3 klst.

Í tilefni af grein Laufeyjar Ómarsdóttur þann 27. júlí 2012 þar sem hún minnist á að börn séu án fata, að 4 ára strákur tók barn hálstaki og keyrði það ofan í stéttina – vil ég benda á að svona atvik er uppeldismál sem kemur að heiman frá og erfitt er fyrir starfsfólk sem starfar á gæsluvellinum að hafa fulla stjórn á hvernig börn haga sér þegar komið er inn á leiksvæðið.

Einnig hefur verið mjög gott veður í sumar og eru lítil börn oft fljót að klæða sig úr fötunum í hitanum og ekkert skaðlegt við það. Starfsfólkið er oft að klæða börnin í fötin aftur og aftur allan liðlangan daginn. Fyrir mér virðast þessi ummæli í blöðunum vera skrifuð af ungum foreldrum sem eiga ekki mörg börn og hafa kannski ekki mikla reynslu eða gera ekki greinarmun á leikskóla og róluvelli.

Ég hef heyrt að flestir okkar foreldra sem eru með börn þarna eru mjög ánægð með starfsemina og ekki er sjálfsagt á þessum tímum að bæjarfélög bjóði upp á þessa þjónustu fyrir íbúa. Þarna starfa ungir krakkar sem hafa tekið vel á móti börnum okkar með bros á vör og hefur mér fundist þessir krakkar hafa reynt að gera allt sem í þeirra valdi stendur til að hafa ofan af fyrir þessum börnum með góðri umsjón og leikjum á hverjum degi nú í sumarfríum leikskólanna.

Í Setbergi er gott eftirlit með börnum okkar og starfa nú bæði kynin þarna og vil ég koma á framfæri þakklæti til Þóru Þórarinsdóttir sem hefur stýrt gæsluvellinum og ættum við einnig að þakka fyrir að hafa svona góðan gæsluvöll yfir sumartímann.

Það er mjög mikilvægt fyrir foreldra að börn okkar geti farið að leika við önnur börn þó svo að hættan á árekstrum sé til staðar. Gæsluvöllurinn hefur nú aldursskipt svæðinu sem sýnir gott úrræði starfsfólks til að gera leikvöllinn hættuminni fyrir þau yngstu sem hafa hingað til verið að leika sér við þau eldri.