Rannsóknarleyfi í Stóru Laxá gefið út

Orkustofnun hefur veitt Landsvirkjun rannsóknarleyfi vegna áætlana um virkjun í efri hluta vatnasviðs Stóru Laxár. Fréttablaðið hefur greint frá umsókninni, en svæðið er utan virkjanakosta sem finna má í rammaáætlun um vernd og nýtingu náttúrusvæða. Steingrímur J. Sigfússon iðnaðarráðherra vill skoða lagabreytingu varðandi slík svæði.

Steingrímur hefur kallað eftir að farið verði hægt í útgáfu leyfa þar til að lokinni vinnu við rammaáætlun. Hann segir ekki heppilegt að gefa slík leyfi í því millibilsástandi sem nú ríki. „Hitt er jafn ljóst að ég ætla ekki að grípa fram fyrir hendur þar til bærra aðila sem samkvæmt lögum verða að afgreiða þau mál sem hjá þeim eru á grunni gildandi laga og réttarástands.“

Iðnaðarráðherra segir útgáfu leyfisins nú sýna mikilvægi þess að hraða vinnu við rammaáætlun eins og kostur er.

„Þá veltir maður því fyrir sér í þessu tilviki með Stóru Laxá, þar sem um óflokkað svæði er að ræða, hvort ekki eigi að huga að því að gera lagabreytingar sem væru á þá leið að óflokkuð svæði skuli meðhöndlast eins og svæði í biðflokki þangað til þau hafa verið flokkuð.“

Steingrímur segir að ákjósanlegast væri að rannsóknir færu ekki fram á vegum aðila sem hafa virkjanir eða nýtingu í huga. Hefðu stjórnvöld meira fé á milli handa væri æskilegast að slíkar rannsóknir færu fram á þeirra vegum og á óháðum forsendum. Ekki hafi þó komið til tals að biðja orkufyrirtækin um að bíða með umsóknir um rannsóknarleyfi. „Ég hef alltaf verið bjartsýnn og trúaður á að orkufyrirtæki í opinberri eigu hefðu hliðsjón af yfirlýstri stefnu stjórnvalda og tækju mark á henni.“

Hörður Arnarson, forstjóri Landsvirkjunar, segir umsóknir fyrirtækisins í fullu samræmi við stefnu stjórnvalda. Kostir lendi í biðflokki vegna skorts á gögnum og þær rannsóknir sem farið sé fram á hafi ekki umhverfisáhrif. „Eingöngu er verið að safna gögnum þannig að hægt sé að leggja þau fram fyrir rammaáætlun og síðar umhverfismat, sem yrði þá næsta skrefið.“- kóp