55 þúsund sóttu um 380 störf

Um 55 þúsund manns sóttu um 380 störf sem auglýst voru hjá IKEA í Barcelona á Spáni. IKEA undirbýr opnun verslunar í borginni síðar á þessu ári, að því er segir á fréttavef Aftenposten sem vitnar í vefsíðuna abc.es.

Næstum fjórðungur Spánverja er án vinnu, þar af yfir helmingur ungs fólks á aldrinum 15 til 24 ára. Alls eru yfir fjórar milljónir Spánverja án atvinnu.

Sjaldgæft er að fyrirtæki á Spáni auglýsi eftir starfsmönnum. IKEA auglýsti eftir starfsmönnum 4. júní síðastliðinn og rann umsóknarfrestur út þann 30. júní.- ibs