Risadagur í ferðaþjónustu reynir á þolmörk landsins

Fimmtán til tuttugu þúsund ferðamenn koma til landsins með fjórum skemmtiferðaskipum og 40 farþegaþotum á næstu klukkutímum. Gjaldeyristekjur af dagdvöl skemmtiferðaskipa skiptir milljörðum í sumar.

„Þetta er of stór dagur fyrir Ísland“, segir Ólafía Sveinsdóttir, deildarstjóri ferðaskrifstofunnar Atlantik, sem hefur með höndum alla umsýslu fyrir um 7.500 ferðamenn auk áhafna þriggja skemmtiferðaskipa sem koma til landsins í dag.

Alls koma fjögur farþegaskip til Reykjavíkur nú fyrir hádegi, en aldrei fyrr hafa svo mörg farþegaskip komið til hafnar sama dag. Farþegar skipanna fjögurra losa áttunda þúsundið auk áhafna skipanna sem eru um þrjú þúsund manns. Þá lenda í dag 40 farþegaþotur á Keflavíkurflugvelli með tæplega átta þúsund farþega, samkvæmt upplýsingum frá Isavia.

„Það er komið vel á annað ár síðan við hófum undirbúning fyrir 18. júní 2012,“ segir Ólafía. „Þetta er mikið púsluspil, þó það megi segja að það sé kostur að stærsti hlutinn sé á einni hendi. Við getum stjórnað umferðinni og tímasett ferðir svo ekki verði árekstrar. Við getum komið í veg fyrir að ekki verði yfirfullt á vissum stöðum og getum tímasett matar- og kaffitíma, heimsóknir á söfn og aðra afþreyingu.“

80% þeirra 7.500 farþega skipanna þriggja sem Atlantik þjónustar ætlar í skipulagðar ferðir í dag, og tölfræðin talar sínu máli um þau tækifæri sem íslensk ferðaþjónusta hefur með stöðugri fjölgun þessa hóps ferðamanna.

Atlantik hefur bókað 105 rútur fyrir daginn og þrjátíu jeppabifreiðar. Einnig fjölmargar litlar rútur til styttri ferða á milli hafnar og miðbæjar Reykjavíkur. Eins kjósa margir farþegar að ferðast með leigubílum. 2.500 manns ætla á Gullfoss og Geysi en skipuleggja þarf matar- og kaffiveitingar bæði í hádegis- og kvöldmat. Hundrað ætla í ferð á Langjökul og fjölmargir í hvalaskoðun. Stór hópur ætlar í útsýnisflug og aðrir ferðast um Reykjanes.

Þó aðeins lítill hluti áhafnar skipanna fari í land þá telur það hratt þegar nokkur hundruð manns fara í styttri bæjarferðir, en eins er mjög vinsælt meðal áhafna skipanna að kíkja í Bláa lónið.

„Við skulum svo ekki gleyma því að þessi skip mörg hver koma við á Akureyri, Ísafirði og öðrum höfnum hérlendis. Því eru margir þessir farþegar að dvelja hér tvo til þrjá daga og kaupgeta þeirra er yfirleitt mikil,“ segir Ólafía.

Eftir stutta eftirgrennslan Fréttablaðsins má áætla að hver ferðamaður af skemmtiferðaskipi verji um tíu til tólf þúsund krónum daginn sem hann dvelur hér á landi. Bara í dag er innspýtingin 100 milljónir frá farþegum skipanna, varlega áætlað.

Hafnasamband Íslands áætlaði í könnun fyrir árið 2009 að gjaldeyristekjur af 74 þúsund ferðamönnum og starfsfólki skemmtiferðaskipa það ár hafi numið þremur milljörðum króna að hafnargjöldum meðtöldum. Þá er önnur umsýsla ótalin; vistir, varahlutir, olíukaup og önnur þjónusta. Áætlanir ferðaþjónustunnar gera ráð fyrir að farþegar skipanna verði um hundrað þúsund í sumar.svavar@frettabladid.is