Fjárveitingar duga ekki fyrir viðhaldi

Bjarni Stefánsson hjá Vegagerðinni segir fjárveitingar í endurnýjun vegakerfisins ekki nægilegar til að sinna brýnum verkefnum. Vegagerðin eyðir rúmlega 600 milljónum í endurnýjun vega. Reykjavíkurborg eyðir 300 milljónum í götur.

„Á heildina litið eru göturnar í verra ástandi en í fyrra,“ segir Bjarni Stefánsson, deildarstjóri viðhalds og þjónustu hjá Vegagerðinni. „Fjármagnið er hins vegar ekki nægjanlegt til að gera það sem þarf að gera.“ Hann segir fjármagnið sem eyrnamerkt hafi verið endurbótum á vegakerfinu ekki meira en undanfarin ár þrátt fyrir verra ástand.

„Það má færa rök fyrir því að þegar yfirborð vega er slitið eins og nú þá geti það verið mun hættulegra en best gæti verið,“ segir Einar Magnús Magnússon, upplýsingafulltrúi Umferðastofu. „Alveg eins og bílar þurfa að vera í lagi og standast skoðun þá þurfa vegir að gera það líka. Við ætlumst til þess að vegfarendur séu á góðum og öruggum bílum og við verðum að gera kröfur um að vegir séu það einnig.“

Einar Magnús segir umferðarslys og umferðaróhöpp samanlagt kosta samfélagið um það bil 30 til 40 milljarða króna á ári. „Ef að örlítið hlutfall óhappa má rekja til slæms ástands vega má sjá að það borgar sig að halda þeim vel við.“

Gert er ráð fyrir að 80.200 fermetrar af götum borgarinnar verði malbikaðir í sumar. Það er Reykjavíkurborg sem hefur umsjón með viðhaldi á götum borgarinnar. Undantekning er þó gerð á stofnæðum í borginni. Vegagerðin hefur umsjón með þeim enda um þjóðvegi að ræða.

Vegagerðin eyðir rúmlega 600 milljónum króna á suðvesturhorninu í endurnýjun vega. Um er að ræða endurnýjun slitlags á stofnæðum á höfuðborgarsvæðinu, á Vesturlandsvegi að Hvalfjarðargöngum, á Akrafjallsvegi frá göngum að Akranesbæ og á þjóðvegum á Suðurnesjum. Fjármagninu verður einnig varið í endurnýjun á þjóðvegi eitt frá Ölvisholtsafleggjara að Þjórsárbrú.

Samkvæmt upplýsingum frá umhverfis- og samgöngusviði Reykjavíkurborgar er ekki hægt að tímasetja einstakt verkefni vegna þess hversu háð veðri og vindum malbikunin er. Áætluð verklok eru 15. september.

Framkvæmt verður á fjölmörgum stöðum í borginni. Í þá rúmlega 80 þúsund fermetra sem malbikaðir verða á vegum borgarinnar fara um 8.500 tonn af malbiki. Rúmlega 53 þúsund fermetrar af gömlu malbiki verða fræstir. Fjárveiting borgarinnar í endurnýjun malbiksslitlaga er 300 milljónir króna.

Borgin mun þó verja samanlagt 2,3 milljörðum króna í gatnaframkvæmdir. Stærsti einstaki liðurinn er umhverfis- og aðgengismál, sem rúmar meðal annars göngu- og hjólreiðastíga.

birgirh@frettabladid.is