Fangelsið á beinu brautina

Þrjár tillögur af átján hlutu verðlaun í hönnunarsamkeppni innanríkisráðuneytisins um nýtt fangelsi á Hólmsheiði í Reykjavík. Fyrstu verðlaun, fimm milljónir króna, hlaut tillaga Arkís arkitekta.

Að sögn Steinunnar Valdísar Óskarsdóttur, sérfræðings í innanríkisráðuneytinu og formanns dómnefndar, taka nú við samningar um endanlega hönnun fangelsisins.

„Vonandi verður hægt að ljúka því og hefja framkvæmdir í upphafi næsta árs,“ segir hún, en stefnt er að því að taka fangelsið í notkun fyrir mitt ár 2015.

Í öðru sæti í samkeppninni var tillaga frá Arkitektur.is, sem fékk fjórar milljónir í verðlaun, og í því þriðja var tillaga Teiknistofunnar Traðar, sem fékk eina milljón króna í verðlaun.

Steinunn segir verkefnið ekki hafa verið einfalt því fangelsið eigi bæði að vera kvennafangelsi og gæsluvarðhalds- og öryggisfangelsi með 56 fangarýmum. Flókið geti verið að tryggja nauðsynlegan aðskilnað fanga og fangadeilda og sveigjanleika í rekstri.

„Þessi hræðilegi atburður sem nýverið varð á Litla Hrauni sýnir hins vegar vel þörfina á því að reisa fangelsi af þessu tagi þar sem hægt er að skilja að hættulega fanga,“ segir hún og vísar til þess að andlát fanga á Litla-Hrauni er talið til komið vegna áverka sem samfangar hans veittu honum. Tveir eru í gæsluvarðhaldi vegna þess máls.

Í niðurstöðu dómnefndar um vinningstillöguna er hún sögð svara einstaklega vel áherslum í samkeppnislýsingu. „Einkum eru gæsluvarðhaldsþættinum gerð frábær skil, sem og aðalvarðstofu og miðlægum rýmum,“ segir þar. Aðalvarðstofan er miðlægur sívalningur umlukinn dagsbirtu sem fellur niður um ofanljós, segir þar jafnframt, og inngarðar sagðir mynda hjarta hverrar fangadeildar.

Ögmundur Jónasson innanríkisráðherra sagði við kynningu á niðurstöðum dómnefndar í gær að um merk tímamót væri að ræða, enda hefði í rúma hálfa öld verið stefnt að því að reisa nýtt fangelsi í Reykjavík.

„Síðan hefur þetta gengið afar skrykkjótt þar til nú að við erum klárlega komin á beinu brautina og sjáum fyrir að fangelsið verði risið og komið í notkun áður en árið 2015 verður runnið á enda,“ sagði hann.

olikr@frettabladid.is