Annþóri og Berki bannað að mæta fyrir dóm

Annþór Kristján Karlsson og Börkur Birgisson fengu ekki að mæta við þingfestingu ákæru á hendur þeim í Héraðsdómi Reykjaness í gær þrátt fyrir óskir þar um.

Annþór og Börkur sitja nú í einangrun á Litla-Hrauni grunaðir um að hafa orðið samfanga sínum að bana og verjendum þeirra var tilkynnt um það í gærmorgun að vegna rannsóknarhagsmuna fengju þeir ekki að mæta í dómssal á meðan.

Verjendurnir tveir létu bóka mótmæli við þessa ákvörðun við þingfestinguna í gær og sögðu að hún bryti gegn mannréttindum skjólstæðinga þeirra, sem hefðu viljað vera viðstaddir og taka afstöðu til ákæruatriðanna. Það munu þeir þurfa að gera síðar.

Þrjár ákærur voru teknar fyrir á sama tíma í þinghaldinu og sameinaðar í eitt dómsmál. Alls eru þrettán ákærðir í málunum, þar af einn í þeim öllum. Sá heitir Sigmundur Geir Helgason, kallaður Simbi, og er liðsmaður Hells Angels.

Fyrsta ákæran snýr að þremur hrottalegum líkamsárásum. Tvær þeirra leiddu Annþór og Börkur og Annþór einn þá þriðju. Átta eru ákærðir með þeim fyrir aðild að árásunum.

Önnur ákæran snýr að árás á dekkjaverkstæði, en hvorki Annþór né Börkur komu þar nærri. Sú þriðja, gegn Sigmundi einum, snýr að vörslu á fíkniefnum.

Sigmundur og hinir tíu sem mættu fyrir dóminn neituðu sök að svo til öllu leyti eða tóku sér frest til að taka afstöðu.- sh