Deyðið aspirnar segja sólarlausir nágrannar

„Hér eru nágrannar að skipa manni að deyða sín eigin tré inni á manns eigin lóð,“ segir Gunnar Jónsson, eigandi íbúðarhússins í Leirutanga 29, sem nú er hótað málsókn vegna hárra aspa sem nágrannar til beggja handa segja skyggja á sólina og valda tjóni og óþrifnaði.

Tvenn hjón sem búa hvor til sinnar handar við Leirutanga 29 krefjast þess með atbeina Húseigendafélagsins að fimmtíu til sextíu hávaxnar aspir á lóðinni hverfi þaðan. Sólar njóti ekki sem skyldi á Leirutanga 31 og þurft hafi að hækka framlóðina við Leirutanga 27 vegna róta frá öspunum. Þá séu íbúar beggja húsanna langþreyttir á óþrifnaði frá trjánum.

„Á vorin er það límkennda harpixið frá hýðinu sem festist á bíla og fleira. Síðsumars er það fræullin sem myndar hvíta drífu á nágrannalóðum, gangstéttum og götum,“ segir í bréfi lögmanns Húseigendafélagsins sem vísar í dóm þar sem húseiganda var gert að fjarlægja tré vegna skuggamyndunar.

„Eigendur Leirutanga 27 og Leirutanga 31 hafa nú falið undirritaðri að gera þá kröfu að þér fellið, fjarlægið og deyðið aspirnar,“ segir lögmaðurinn í bréfinu og gefur Gunnari eins mánaðar frest til verða við kröfunni.

„Þetta bréf hljómar eins og skipun frá dómstól,“ segir Gunnar sem kveðst alls ekki ætla að fara að kröfum Húseigendafélagsins og nágrannanna í Leirutanga. Hann gagnrýnir Húseigendafélagið fyrir að hafa aldrei rætt við hann áður en kröfubréfið var sent. Skýringuna á þeim vinnubrögðum rekur hann til viðhorfa sem formaður félagsins hafi sett fram í blaðagreinum. „Hann er bókstaflega búinn að frísa af grimmd gegn öspum.“

Gagnrýni nágrannanna vísar Gunnar á bug. „Það er allsendis út í loftið,“ segir hann um fullyrðingar um tjón og óþrif af völdum aspanna. „Auðvitað fýkur af trjám en það fýkur jafnt af trjám réttlátra sem ranglátra.“

Þá segir Gunnar trén orðin á bilinu þrjátíu til fjörutíu ára og því friðhelg fyrir aldurs sakir. „Fyrir utan að það er nú þegar búið að fella þau flest,“ bætir hann við og útskýrir að hann hafi orðið við ýmsum beiðnum nágrannana og fellt sum tré og leyft að greinar yrðu sagaðar af upp í fimm metra hæð til að hleypa sólarljósi að. Eftir að hann hafi leigt húsið út hafi enn fleiri tré verð felld með samþykki konu hans – þótt það hafi reyndar ekki verið með hans vitund og vilja. Nú vilji nágrannarnir meira. „Þetta bréf er bara skipun um að ég drepi tréin mín,“ segir Gunnar sem lýsir kröfunni sem inngripi í hans eignarrétt.

gar@frettabladid.is