Afmælisveislan fékk sjö tilnefningar

Menning Leiksýningarnar Afmælisveislan, Heimsljós, Hreinsun, Vesalingarnir og Tengdó eru tilnefndar til Grímuverðlauna sem besta sýning ársins. Tilnefningar voru kynntar í Tjarnarbíói í gær.

Afmælisveislan hlaut flestar tilnefningar, sjö talsins, Heimsljós hlaut fimm og Hreinsun fjórar.

Alls komu 89 sviðslistaverkefni til álita í ár til að hljóta Grímuna, að því er kemur fram á vef Grímunnar. Þar af voru 23 danssýningar, 9 barnasýningar og 7 útvarpsverk.

Verðlaun eru veitt í nítján verðlaunaflokkum, en fjórar sérstakar fagnefndir Grímunnar skoða verkin með tilliti til verðlaunanna.

Í ár var tekinn upp nýr verðlaunaflokkur, Sprotinn, sem veittur er fyrir „frumleika og framúrskarandi nýbreytni“ á leikárinu. Auk þess verða veitt hin árlegu heiðursverðlaun Grímunnar.

Grímuhátíðin sjálf, árleg uppskeruhátíð sviðslistageirans, verður haldin í tíunda sinn í Hörpu hinn 14. júní næstkomandi. Hátíðin verður í beinni útsendingu á Stöð 2 og daginn eftir verður sýndur sérstakur þáttur um hátíðina.

- þj