Kvöð um 50 ára aldursmark óbreytt

Félagið FM-hús ehf. sem á íbúðablokkina Skipalón 10 til 14 fær ekki fellda niður kvöð sem er á húsinu og öðrum fjölbýlishúsum í næsta nágrenni í Skipalóni um að íbúar á svæðinu séu fimmtíu ára eða eldri.

Erindi FM-húsa var tekið fyrir í skipulags- og byggingaráði Hafnarfjarðar á þriðjudag. Fjöldi athugasemda barst frá íbúum til beggja handa við Skipalón 10.

„Íbúar benda á að þeir hafi keypt þessar eignir meðal annars vegna þess að þeir óski að búa í rólegu umhverfi, þeir hafi greitt hærra verð fyrir eignir sínar vegna þess að þær þjónuðu hagsmunum 50 ára og eldri," segir í samantekt skipulagssviðs um athugasemdirnar. Þeir telji breytinguna mundu valda þeim tjóni. „Íbúar telja ekki málefnalegar ástæður eða rök liggja fyrir breytingunni og að þeir munu fara fram á ógildingu og/eða skaðabætur verði hún samþykkt."

FM-hús óskuðu eftir afléttingu kvaðarinnar þar sem sala íbúða til aldurshópsins yfir fimmtíu ára hafi verið

„afskaplega þung eftir svokallað efnahagshrun," eins og segir í umsókn félagsins. Benedikt Steingrímsson hjá FM húsum segir að við þessa afgreiðslu verði látið sitja. „Við ruggum ekki þessum báti meira," segir Benedikt. - gar