Fleiri stelpur læra að slást

Bardagaíþróttir sækja stöðugt í sig veðrið á Íslandi. Strákar hafa verið í meirihluta þeirra sem iðka sportið, en áhugi stelpna hefur aukist mikið undanfarið.

„Við erum rosalega ánægðir með þessa aukningu," segir Jón Viðar Arnþórsson, formaður bardagaíþróttaklúbbsins Mjölnis.

Áhugi kvenfólks á bardagaíþróttum hefur stóraukist undanfarin misseri. Jón Viðar hjá Mjölni segir mikla fjölgun hafa átt sér stað frá því að klúbburinn flutti í kastalann svokallaða, sem hýsti áður starfsemi Loftkastalans. „Við byrjuðum með stelputíma í vetur og þannig náðum við að halda enn þá betur í þær," segir Jón og bætir við að box og glímutími sé í boði sérstaklega fyrir stelpur, en í öðrum tímum eru að sjálfsögðu bæði kynin.

En hvað veldur þessum aukna áhuga?

„Það er erfitt að segja, þær eru bara að uppgötva hvað þetta er skemmtilegt. Þetta er fyrir alla, ekki bara stráka - það heldur líka betur betur í strákana að hafa stelpurnar," segir Jón Viðar í léttum dúr.

Sigursteinn Snorrason hjá Combat Gym tekur í sama streng og finnur fyrir auknum áhuga hjá stelpunum. „Stelpurnar sækja í aðeins öðruvísi greinar en strákarnir," segir hann og bætir við að fáar stelpur séu í blönduðum bardagalistum, en á móti séu þær um helmingur iðkenda taekwondo í Combat Gym.

„Þetta hefur þróast svona í gegnum árin, aðallega vegna þess að okkar helsta afreksfólk í taekwondo eru tvær stelpur."

Sigursteinn segir algengt að stelpur komi saman í hópum, ólíkt strákunum sem koma oftast einir eða með einn félaga með sér. „Stelpurnar eru að fatta að þetta snýst bara ekki um að setja á sig hanska og lemja hverja aðra."

Mjölnir, Combat Gym og fleiri bardagaklúbbar eru með byrjendanámskeið, þar sem farið er yfir undirstöðuatriðin. Á heimasíðum klúbbanna, mjolnir.is og combat.is, má finna nánari upplýsingar.

atlifannar@frettabladid.is