Brotið blað í íslenskri flugsögu

Í gær frumsýndi Þyrluþjónustan nýja þyrlu sem notuð verður í skoðunarferðir ferðamanna um Ísland. Þetta er í fyrsta sinn sem þyrla er keypt til landsins gagngert til farþegaflugs og því ákveðið skref sem Þyrluþjónustan steig með þessu uppátæki.

Þyrlan er af gerðinni Bell 407GX af árgerð 2012. Þyrluþjónustan segir hana án efa þá glæsilegustu á landinu. Hún rúmar 6 farþega. Gluggarnir eru stórir og kúptir sem gerir útsýnið úr vélinni gríðarlega mikið.

Eftirspurn eftir því að skoða náttúru Íslands frá þessu óvenjulega sjónarhorni hefur aukist að undanförnu og Þyrluþjónusta hefur fundið fyrir mikilli vakningu jafnt meðal Íslendinga og ferðamanna.