Skiptar skoðanir í utanríkismálanefnd um framhald ESB-viðræðna

Árni Þór Sigurðsson formaður utanríkismálanefndar vill halda aðildarviðræðum við Evrópusambandið áfram. Kosið verði um aðild þegar samningur er til lykta leiddur. Guðfríður Lilja Grétarsdóttir, þingmaður VG, lagði fram bókun á fundi utanríkismálanefndar í morgun þar sem hún fer fram á að efnt verði til þjóðaratkvæðagreiðslu um málið fyrir lok þessa árs. Fréttastofa RÚV greindi frá því í dag að hugsanlega sé meirihluti í nefndinni fyrir þessari tillögu Guðfríðar, en þingmenn Sjálfstæðisflokksins og Framsóknarflokksins hafa gagnrýnt aðildarviðræðuferlið harðlega.

„Menn hafa verið að lýsa skoðunum sínum í því efni en það er engin tillaga komin fram um það í nefndinni," segir Árni Þór Sigurðsson, formaður utanríkismálanefndar Alþingis. Árni segir að ekkert nýtt sé í afstöðu Guðfríðar Lilju. Hún hafi lýst skoðunum sínum á aðild Íslands að Evrópusambandinu margsinnis.

„Það hefur verið mín afstaða og er óbreytt ennþá að ég tel að greiða eigi atkvæði um svona afdrifarík mál mál þegar niðurstaða í viðræðunum liggur fyrir og það sé greidd atkvæði um samningsniðurstöðuna," segir Árni Þór. Ekki sé nægjanlegt að hafa lokið umfjöllun um einhverja tiltekna þætti.

Árni Þór bendir á að þeir kaflar sem þegar sé búið að ljúka við í aðildarviðræðunum séu EES-kaflar og Schengen kaflar sem Íslendingar séu þegar aðilar að. Ekki sé farið að reyna á kafla eins og sjávarútveg, landbúnaðarmál, gjaldmiðlamál og fleiri kafla sem skipti máli. „Mér finnst orka tvímælis að fara í atkvæðagreiðslu um málið fyrr en það liggur fyrir," segir Árni Þór. Málinu sé ekki lokið fyrr en afstaða hafi verið tekin til þessara atriða.