Gréta Salóme: Síðasta rennsli fyrir keppni gekk vel

„Það er alveg svakalega góð stemning hérna," segir Gréta Salóme Stefánsdóttir, lagahöfundur og annar flytjandi íslenska Eurovision lagsins. Þáttastjórnendur útvarpsþáttarins Reykjavík síðdegis ræddu við Grétu í dag en hún var þá nýstigin af sviði í Bakú.

„Við vorum að taka seinna rennsli á laginu og það gekk eins og í sögu," segir Gréta. „Við erum náttúrulega búin að æfa lagið mikið — þetta er í raun komið í vöðvaminnið núna."

Fyrri undankeppni söngvakeppninnar fer fram í kvöld. Gréta, Jónsi og föruneyti þeirra eru önnur í röð keppenda á svið. Veðbankar ytra spá Íslendingum góðu gengi í keppninni í ár en Gréta segist þó gefa lítið fyrir slíkar spár.

Þetta er í fyrsta sinn sem Gréta tekur þátt í Eurovision. Hún segir keppnina vera magnaða upplifun. „Það er alltaf erfitt að keppa í tónlist. Ómögulegt er að segja hvað verður ofan á, lagið sjálft, flutningurinn eða umgjörðin."

Hægt er að hlusta á áhugavert viðtal við Grétu Salóme hér fyrir ofan. Þá er einnig hægt að hlusta á lagið hér.