Nú kom heimsmetið hjá Bolt - vann sitt þriðja gull eins og Allyson Felix

Jamaíkamaðurinn Usain Bolt og bandaríska konan Allyson Felix unnu bæði í kvöld sín þriðju gullverðlaun á Ólympíuleikunum í London þegar þau hjálpuðu sveitum sínum að vinna síðustu boðhlaupin á leikunum.

Usain Bolt hljóp síðasta sprettinn fyrir sveit Jamaíku í 4 x 100 metra hlaupi karla og kom í mark á nýju heimsmeti eða 36,84 sekúndum. Það dugði ekki bandarísku sveitinn að setja landsmet og koma í mark á 37.04 sekúndum eða sama tíma og gamla heimsmetið var. Sveit Trínidad og Tóbagó fékk síðan bronsið.

Usain Bolt náði ekki heimsmetunum sínum þegar hann tryggði sér gull í 100 og 200 metra hlaupunum en nú hljóp hann á fullu í gegnum markið og heimsmetið var í höfn.

Auk Usain Bolt voru í sveitinni Nesta Carter, Michael Frater og Yohan Blake en Kemar Bailey-Cole datt úr liðinu fyrir úrslitahlaupið til þess að Bolt gæti hlaupið.

Allyson Felix hljóp annan sprettinn fyrir bandarísku sveitina sem vann 4 x 400 metra hlaup kvenna. Felix varð Ólympíumeistari í 200 metra hlaupi og í gær hjálpaði hún bandarísku boðhlaupssveitinni að vinna 4 x 100 metra hlaupið á nýju heimsmeti.

Auk Allyson Felix voru í gullsveit Bandaríkjanna þær DeeDee Trotter, Francena McCorory og Sanya Richards-Ross. Bandaríska sveitin kom í mark á 3:16,87 mínútum og Bandaríkin fékk gullið í þessari grein á fimmtu leikunum í röð. Rússland fékk silfrið og bronsið fór til Jamaíka.